काठमाडौं/अगामी साउन १६ गतेदेखि प्रदर्शनमा आउने निर्देशक विभोर पोखरेलद्वारा निर्देशित फिल्म रियाल रिङ्गेट’ को पहिलो गीत ‘जिन्दगी उडि जाने’ को भिडियो मंगलवार सावर्जनिक गरिएको छ । नयाँ वानेश्वरस्थित आईएनआई सिनेमामा आयोजित एक समारोहमा गगन लाल प्रधानद्वारा निर्मित उक्त फिल्मको पहिलो ओरिजिनल साउण्ड ट्रयाक सार्वजनिक गरिएको हो ।फिल्मको कथावस्तुलाई समेत चित्रण गरिएको यो गीतको भिडियोमा फिल्मका मुख्य कलाकारहरु प्रमोद चौलागाई, नीता ढुंगाना, रविन्द्र खड्कासहितका अधिकांश कलाकारहरु फिचर्ड गरिएको छ ।

केतन क्षेत्रीको स्वरको यो गीतका शब्दहरु कोशिश क्षेत्री तथा रवि मल्लले रचना गरेका हुन् । चन्द ध्वान केसीले यो गीतलाई संगीतवद्ध गरेका हुन् । किरण तुलाधरको संगीत संयोजन रहेको यो गीतमा नाथान रायनको कवितात्मक प्रस्तुति निकै शसक्त सुनिएको छ ।रेबेल फिल्मसद्वारा निर्मित यो फिल्मको गीतले वैदेशिक रोजगारीमा होमिन बाध्य नेपालीहरूको मार्मिक कथा समेटेको छ । यो गीतमा विदेशमा नेपालीले भोग्ने सङ्घर्ष, उनीहरूको घरपरिवारको विचलित अवस्था र बाध्यताले विदेसिनु पर्दाको पीडालाई गहिरो रूपमा प्रस्तुत गरेको छ । समारोहमा कार्यक्रममा कवि नाथन रायनले आफ्नो कविता वाचन गरे, जहाँ मामुली मजदुरका रूपमा विदेसिन बाध्य नेपालीहरूको मार्मिक भावना पोखिएको छ । कवि रायनका शब्दहरूले ‘जब त्रिभुवन विमानस्थलबाट जहाज उड्यो, जहाजसँगै सपना र जिन्दगी उड्यो’ भन्ने ट्यागलाइनमार्फत चलचित्रको समग्र मर्मलाई सशक्त रूपमा चित्रण गर्दछ । गायक केतन क्षेत्रीले प्रत्यक्ष गीत गाएर उपस्थित सबैलाई मन्त्रमुग्ध पारेका थिए ।

समारोहमा फिल्मका निर्देशक विभोर पोखरेलले फिल्म ‘रियाल रिङ्गेट’ हरेक नेपालीको कथा भएको जिकिर गर्दै यो फिल्मले आम दर्शकको मन छुन सफल हुने विश्वास व्यक्त गरे ।

निर्माता गगनलाल प्रधानले वैदेशिक रोजगारीको विषय उठाउनै पर्ने भएकोले यसमा लगानी गरेको बताए । दुई दशकभन्दा बढी समयदेखि रेबेल क्रियशन सञ्चालन गर्दै आएका प्रधानले यसअघि २०३९ सालमा भिडियो फिल्म ‘अभिलाषा’ निर्माण गरेका थिए । साथै, रेबेल क्रियशनमार्फत् प्रधानले दर्जनौँ गायक गायिका, निर्देशक तथा कलाकारहरूलाई स्थापित गरेका छन् ।

अभिनेत्री नीता ढुङ्गानाले लामो समयको मेहनतपछि फिल्म रिलिजको सङ्घारमा पुगेकोमा खुशी व्यक्त गरिन् भने अभिनेता प्रमोद चौलागाईंले निकै सोच विचार गरेर मात्र यो फिल्ममा अभिनय गरेको बताए ।

चलचित्र कलाकार संघका निवर्तमान अध्यक्ष तथा फिल्मका कलाकार रविन्द्र खड्काले ‘रियाल रिङ्गेट’ फिल्मले नेपालको वर्तमान यथार्थतलाई चित्रण गर्दै सरकारले एकातिर युवाहरुलाई विदेश जान रोक्ने नारा चलाउने तथा स्वदेशमा रोजगारी नपाएर विदेश जान बाध्य हुनु पर्ने नेपाली युवाको कथालाई यो फिल्मले चित्रण गरेको बताए ।

यो फिल्ममा प्रमोद चौलागाईं, निता ढुङ्गाना, छुल्ठिम डोल्मा गुरुङ, रवीन्द्र खड्का, ध्रुव कोइराला, प्रेम सुब्बा, रामचन्द्र अधिकारी, रियर राई, रोशन श्रेष्ठ, ईश्वरी बराल, विमला गिरी लगायतका कलाकारहरूको अभिनय रहेको छ ।

प्रदीप भारद्वाज फिल्मका लेखक हुन् । फिल्मको नाम ‘रियाल रिङ्गेट’ कतार र साउदी अरेबियाको मुद्रा ‘रियाल’ तथा मलेसियाको मुद्रा ‘रिङ्गेट’ को मिश्रणबाट बनेको छ, जसले नेपाली श्रमिकहरूको मुख्य गन्तव्य मुलुकहरूलाई सङ्केत गर्दछ ।

रोशन श्रेष्ठको द्वन्द्व निर्देशन, हरि घलेको छायाङ्कन, विपिन मल्लको सम्पादन, किरण तुलाधरको ब्याकग्राउन्ड स्कोर र राजीव समरको कोरियोग्राफी रहेको छ ।

गीतहरूमा रामचन्द्र काफ्ले, किरण तुलाधर र चन्दन ध्वज केसीको सङ्गीत तथा सुगम पोखरेल, केतन क्षेत्री, रामचन्द्र काफ्ले र जुनु रिजाल काफ्लेको स्वर सुन्न सकिने छ । गीतका शब्दहरू अमर न्यौपाने, रवि मल्ल, कोसिस क्षेत्री, प्रदीप भारद्वाज र चन्दन ध्वज केसीले लेखेका हुन् ।

भारतको राजस्थान, नेपालका चितवन, काठमाडौं र लेटाङमा छायाङ्कन गरिएको यो फिल्मलाई काफिया फिल्म्सले वितरण गर्दैछ ।

कार्यक्रमका बीचमा फिल्म युनिटले एक दुःखद खबर सार्वजनिक गरेको थियो । यस फिल्मकी कलाकार अनिशा सदा जनकपुरस्थित स्थानीय फिल्मको छायाङ्कनस्थलमा मृत भेटिएको जानकारी गराउँदै सदाप्रति कार्यक्रममा हार्दिक श्रद्धाञ्जली अर्पण गर्दै एक मिनेट मौन धारण गरिएको थियो ।