भरतपुर/३५ वर्ष पूरा गरी ३६ औं वर्षमा प्रवेश गरेको उपलक्ष्यमा चितवन उद्योग संघले आफ्नो ३६ औं स्थापना दिवस एक कार्यक्रमका बीच सम्पन्न गरेको छ ।
चितवन उद्योग संघका कार्य वाहक अध्यक्ष मदन घिमिरेको अध्यक्षतामा सम्पन्न कार्यक्रममा चितवन जिल्लाका प्रमुख जिल्ला अधिकारी प्रकाश पौडेल प्रमुख अतिथि रहनुभएको थियो । प्रमुख अतिथि पौडेलले संघ परिसरमा राखिएको नेपालको राष्ट्रिय झण्डा र संघको झण्डा झण्डोत्तोलन गरी कार्यक्रमको शुभारम्भ गर्नुभएको थियो ।
प्रमुख अतिथि पौडेलले संघले आफ्नो परिसरमा राष्ट्रको राष्ट्रिय झण्डालाई साक्षी राखी संघको ३६ औं स्थापना दिवस मनाउँदै गर्दा अझै बर्षौबर्ष यसरी नै स्थापना दिवस मनाउँदै जानेछ भन्दै शुभकामना समेत व्यक्त गर्नुभयो ।
कार्यक्रमका विशिष्ट अतिथि चितवन उद्योग संघ, गभर्निङ काउन्सिलका अध्यक्ष भेषराज दुवाडीले अग्रजहरुले जुन उद्देश्यका साथ संघको स्थापना गर्नु भएको छ त्यसलाई संघले कुनैपनि समयमा भुल्न नहुने बताउनुभयो ।
त्यस्तै विशिष्ट अतिथि चितवन उद्योग संघ, पूर्व अध्यक्ष मण्डलका अध्यक्ष त्रिलोचन कँडेलले वर्तमान समितिले विगतका कार्यकालहरुमा भएका गतिविधिहरुलाई मनन गरी नयाँपन र थप उर्जाका साथ अगाडि बढ्नु पर्ने बताउनुभयो ।
संघ स्थापना दिवसको अवसरमा नेपाल घरेलु तथा साना उद्योग महासंघका केन्द्रीय संस्थापक अध्यक्ष ओम बहादुर गुरुङ, वस्तुगत समितिहरुको प्रतिनिधित्व गर्दै नेपाल कुखुरा व्यवसायी मञ्चका अध्यक्ष रघुनाथ भट्ट, पालिका समितिहरुको प्रतिनिधित्व गर्दै रत्ननगर पालिका समितिका अध्यक्ष उमाकान्त पौडेल, महिला उद्यमीहरुको प्रतिनिधित्वि गर्दै महिला उद्यमी मञ्चकी पूर्व अध्यक्ष पवित्रा जोशी, युवा उद्यमीहरुको प्रतिनिधित्व गर्दै युवा उद्यमी मञ्चका आर्थिक निर्देशक अनिष पौडेल लगायतले शुभकामना व्यक्त गरेका थिए ।
चितवन उद्योग संघका कार्यकारी निर्देशक गणेश प्रसाद सिलवालले सञ्चालन गर्नुभएको कार्यक्रमलाई चितवन उद्योग संघका उपाध्यक्ष गजेन्द्र अधिकारीले धन्यवाद मन्तव्य सहित कार्यक्रम समापन गर्नुभएको थियो ।