कालिका/चितवनका सातवटा स्थानीय तहमध्ये कालिका नगरपालिका हाल पुन: चितवन जिल्लामा सबैभन्दा कम अद्यावधिक बेरूजु कायम गर्न सफल भई प्रथम हुन सफल पालिका बनेको छ ।
महालेखापरीक्षकको कार्यालयले २०८२ साल बैशाखमा सार्वजनिक गरेको ६२औँ वार्षिक प्रतिवेदन अनुसार आर्थिक वर्ष २०८०/८१ मा १ अर्व ७७ करोड ८६ हजारको रुपैयाँको लेखापरीक्षण गर्दा १ करोड ४६ लाख ७० हजार रुपैँया अर्थात ०.८३ प्रतिशत मात्र अद्यावधिक बेरुजु देखिएको हो ।
महालेखा परीक्षकको कार्यालयका अनुसार, अद्यावधिक बेरूजु भनेको स्थानिय तहको स्थापना पछि आर्थिक वर्ष २०७४र०७५ बाट हालसम्म कायम भएको बेरुजुलाई जनाउछ ।
यस पालिका हाल नेपालका ७५३ स्थानीय तहहरू मध्ये सबैभन्दा कम बेरूजु भएको शिर्ष १० पालिकामा पुनः पर्न सफल भएको उल्लेख गरिएको छ ।
२०७४ सालमा नगरपालिका स्थापना भएसंगै आर्थिक वर्ष २०८०/०८१ सम्म कालिका नगरपालिकाको अद्यावधिक कुल बेरूजु रु ५ करोड ६६ लाख ७९ हजार देखिएको छ । यो वर्ष १३ लाख ३४ हजार बेरुजु घटाउन सफल भएको छ । हालको स्थानीय तहको दोस्रो कार्यकालको जनप्रतिनिधि आएसंगै बेरुजु घटाउन प्राथमिकता राखि विभिन्न कार्यक्रमहरु गरेको छ ।
लेखा समितिका संयोजक टिकाराम रेग्मीका अनुसार विभिन्न बेरुजुहरु असुल गरी नगरपालिकाको खातामा जम्मा गरिएको जानकारी दिए ।
पेश्कि रकमलाई पेश्कि फर्छौट तथा नगरपालिकाले आवश्यक अनुसार विभिन्न कानुन तथा कार्यविधि निर्माण तथा लेखा समितिको निरन्तर प्रयास कालिका नगरपालिकाको अध्यावधिक बेरुजु कम हुन गएको लेखा समितिका संयोजक तथा वडा नं. ६ का वडा अध्यक्ष टिकाराम रेग्मीले बताए ।
आर्थिक वर्ष २०८०/०८१ सम्मको महालेखा परिक्षकको प्रतिवेदनमा देखाईएको तथ्याङक अनुसार कालिका नगरपालिकाको हाल रु ५ करोड ६६ लाख ७९ हजार चितवन जिल्लाको सबैभन्दा कम अद्यावधिक बेरुजु बाँकी छ ।
दोस्रो क्रममा रत्ननगर नगरपालिकाको १० करोड २ लाख ७९ हजार अद्यावधिक बेरुजु, तेस्रो कममा ईच्छाकामना गाउँपालिकाको १० करोड ८० लाख ६४ हजार, चौथो कममा खैरहनी नगरपालिकाको १२ करोड ८५ लाख ३ हजार, पाँचौ कममा राप्ती नगरपालिकाको ३६ हजार ३ लाख ७१ हजार, छैठौं कममा माडी नगरपालिकाको ४८ करोड १४ लाख ७३ हजार, सातौं कममा जिल्लाको एकमात्र महानगर भरतपुर महानगरपालिकाको १ अर्व ३ करोड ५३ लाख ८ हजार सबैभन्दा धेरै अद्यावधिक बेरुजु बाँकी छ ।
चितवन जिल्लाकै सबैभन्दा कम रु ५ करोड ६६ लाख ७९ हजार अद्यावधिक बेरुजु कायम गर्न सफल भएको कालिकाका नगर प्रमुख विनोद रेग्मीले बताए । नगरपालिका निरन्तर सुधारको पक्षमा गईरहेको बताउदै नगर प्रमुख रेग्मीले कानुनहरुको निरन्तर पालना तथा सम्पूर्ण सरोकारवालाहरुको सहयोगले बेरुजु कम गर्न सफल भएको प्रतिक्रिया दिए ।
कालिका नगरपालिकाका वरिष्ठ लेखा अधिकृत ऋषि प्रसाद कडुवालका अनुसार नगरपालिकाले बजेट तर्जुमा गर्दा र खर्च गर्दा नेपाल सरकार तथा बागमति प्रदेश सरकारको सम्पूर्ण कानुनहरु पूर्ण पालना गरेको र नगरपालिकाले आफैले बनाउनु पर्ने कानुन, कार्यबिधिहरु र मापदण्डहरु बनाई तिनिहरुको पूर्ण पालना गर्दा बेरुजु न्यूनीकरण सम्भव भएको हो । कालिका नगरपालिको अद्यावधिक बेरुजु कम हुनुमा जनप्रतिनिधिहरुको निरन्तर प्रयास र कर्मचारीहरुको असल नियत तथा सरोकारवालाहरुको साथ र सहयोगले सम्भवभएकोले सबैलाई धन्यवाद व्यक्त गरे ।
