माडी, ०५ असोज/चितवन उद्योग संघको ३० औं बार्षिक साधारणसभा तथा चितवन औद्योगिक विकास वचत तथा ऋण सहकारी संस्था लिमिटेडको सदस्यता वृद्धि गर्ने उद्देश्यका साथ माडीका उद्योगीहरुबीच छलफल एवं भेटघाट भएको छ ।
चितवन औद्योगिक साकोसका कोषाध्यक्ष एवं संघका उपाध्यक्ष दुर्गाप्रसाद भण्डारीको विशेष उपस्थिति, संगठन विभागका संयोजक एवं उपाध्यक्ष गजेन्द्र अधिकारीको अध्यक्षतामा सम्पन्न बैठकमा साधारणसभाको मोडालिटी, आर्थिक वर्ष ०७६/०७७ को लेखा परीक्षण, कार्य विभाजनका विषयमा छलफल भएको थियो ।
बैठकले रमेश नेपालीको अध्यक्षतामा चितवन उद्योग संघ युवा उद्यमी मञ्च र लक्ष्मी महतोको अध्यक्षतामा महिला उद्यमी मञ्चको गठन समेत गरेको छ । चयन भएका अध्यक्षहरुले इकाई समितिको साधारणसभा अघि अन्य सदस्यहरुको टुङ्गो लगाउने छन् । बैठकले भोजराज देवकोटालाई माडी इकाई समितिमा मनोनयन समेत गरेको थियो । इकाई समितिको बैठकले १५ गते माडी इकाई समितिको साधारणसभा गर्ने । साधारणसभाको लागि प्रेमनाथ भुषालको संयोजकत्वमा तयारी उपसमिति गठन गरेको छ । जसको सदस्यहरुमा भोजराज देवकोटा, लक्ष्मी महतो रहेका छन ।
बैठकमा संगठन विभागका संयोजक गजेन्द्र अधिकारी, चितवन उद्योग संघ माडी इकाई समितिका अध्यक्ष भोजराज खनाल, चितवन उद्योग संघका उपाध्यक्ष दुर्गाप्रसाद भण्डारी, महिला उद्यमी मञ्चकी अध्यक्ष सुधा सुवेदी पौडेल, प्रशासकीय अधिकृत गोविन्द प्रसाद पौडेल, माडी इकाई समितिका सचिव रमेश नेपाली, कोषाध्यक्ष नारायणदत्त रिजाल, सदस्यहरु घनश्याम चौधरी, कौशिल्य देवी शाह, लक्ष्मी कुमारी महतोलगायतको सहभागिता रहेको थियो ।
Advertisement
