भरतपुर/बि.एम.हस्तकला प्रशिक्षण उद्योगको आयोजना तथा हाम्रो सहयोग फाउण्डेशनको सहकार्यमा भरतपुर कारागारमा रहेको बन्दी महिलाहरुलाई ३ महिने ढाकाको कपडा बुन्ने तालिमको शुरु भएको छ ।
बि.एम.हस्तकला प्रशिक्षण उद्योगकी अध्यक्ष बुद्धिमाया घलेको अध्यक्षतामा सम्पन्न तालिममा बागमती प्रदेश सदस्य ईश्वर सापकोटा (सुमन) प्रमुख अतिथि रहनुभएको थियो । प्रमुख अतिथि सापकोटाले बन्दी महिलाहरुलाई लक्षित गरी शुरु गरिएको तालिमले महिलाहरुमा सीपसँगै ज्ञानको समेत विकास हुने विश्वास व्यक्त गर्नुभयो ।
सहकार्य संस्था हाम्रो सहयोग फाउण्डेशनका अध्यक्ष रामसिंह मोक्तानले स्वागत मन्तव्य राख्नुभएको कार्यक्रममा जिल्ला प्रशासन कार्यालय चितवनका सहायक प्रमुख जिल्ला अधिकारी चुडामणी गौतम, चितवन उद्योग संघका कार्य वाहक अध्यक्ष मदन घिमिरे, भरतपुर कारागारका प्रमुख रविन्द्र ढुङ्गानाले तालिमको सफलताको कामना गर्नुभयो ।
तीन महिनासम्म सञ्चालन हुने तालिमलाई गोपी मगरले प्रशिक्षण दिनुहुनेछ । कल्पना आचार्यले सञ्चालन गर्नुभएको कार्यक्रमलाई बि.एम.हस्तकला प्रशिक्षण उद्योगकी अध्यक्ष बुद्धिमाया घलेले धन्यवाद मन्तव्य सहित समापन गर्नुभएको थियो ।