नेपाल आयुर्वेद औषधी व्यवसायी संघ जिल्ला कार्य समिति, चितवनको चौथो साधारण सभा र दोस्रो जिल्ला अधिवेशन भरतपुरस्थित पर्व व्याङ्क्वेट सभाहलमा भव्य रूपमा सम्पन्न भएको छ। कार्यक्रमको अध्यक्षता संघका जिल्ला अध्यक्ष श्री अशोक श्रेष्ठले गर्नुभएको थियो भने प्रमुख अतिथिका रूपमा नेपाल आयुर्वेद औषधी व्यवसायी संघका केन्द्रीय अध्यक्ष श्री रामचन्द्र बुढाथोकी उपस्थित हुनुहुन्थ्यो।
यस अवसरमा विशिष्ट अतिथिहरूको रुपमा औषधी उत्पादन केन्द्र, रत्ननगर टाडीका प्रमुख श्री सुरेश महर्जन, सोही केन्द्रकी उप-प्रमुख र भैषज्य विज्ञ डा. कोपिला अधिकारी, नारायणी धर जग्गा तथा आवासका अध्यक्ष श्री बाबुराम अधिकारी, डा. चन्द्रकान्त ज्ञावली, केन्द्रीय नाडाका उपाध्यक्ष निर्मला के.सी. र नाडा वाग्मती प्रदेश अध्यक्ष सन्तोष ढुंगेल लगायतका व्यक्तिहरूको उपस्थिति रहेको थियो।
कार्यक्रममा संघका निवर्तमान अध्यक्ष कमल प्रसाद ओली, डा. बुद्धि प्रसाद ढकाल, डा. पी. एन. भुषाल, स्याङ्जा नेवा गुठीका अध्यक्ष गोविन्द श्रेष्ठ तथा भिमसेन साकोसका सचिव पुण्य श्रेष्ठ जस्ता महत्वपूर्ण व्यक्तिहरूले पनि सहभागिता जनाउनुभएको थियो। संघप्रति विभिन्न समयमा योगदान पुर्याउने व्यक्तित्वहरूलाई कदरपत्र र दोसल्ला प्रदान गरेर सम्मान गरिएको थियो। साथै, महासचिव तारानाथ अधिकारी, डा. आचल श्रेष्ठ र वाग्मती प्रदेश उपाध्यक्ष अनुप ढुगांनालाई विशेष सम्मान पनि प्रदान गरिएको थियो।
संघको दोस्रो जिल्ला अधिवेशनबाट नयाँ कार्यसमिति निर्विरोध रूपमा चयन भएको छ । नवनिर्वाचित कार्यसमितिको अध्यक्षमा अशोक श्रेष्ठ, उपाध्यक्षमा हिरामणि शर्मा, सचिवमा केदार और्याल, कोषाध्यक्षमा दुर्गाराज भण्डारी, सदस्यहरूमा लाल प्रसाद पौड्याल, मौसम लाल गुप्ता, डा. अशोक कुमार महतो, गोविन्द पौड्याल, डा. कृष्णप्रसाद पोखरेल, रञ्जना गुरुङ, सन्जिता भुसाल रहनु भएको छ ।
पुनः निर्वाचित अध्यक्ष अशोक श्रेष्ठले आगामी पाँच वर्षभित्र नाडा चितवनको आफ्नै जग्गामा भौतिक भवन निर्माण गर्ने र सोही भवनमा नियमित योग कार्यक्रम सञ्चालन गर्ने प्रतिबद्धता व्यक्त गर्नुभएको छ। कार्यक्रमले चितवनमा आयुर्वेद औषधी व्यवसायलाई अझ व्यवस्थित, व्यावसायिक र जनमुखी बनाउने दिशामा नयाँ ऊर्जा थपेको छ।
