होबार्ट / अष्ट्रेलियाको तास्मानिया राज्यमा बसोबास गर्ने दुई नेपाली युवाले एकैसाथ अवार्ड जित्दै नेपाली समुदायलाई गर्व गराएका छन्। सम्मानित बन्ने यी दुई हुन् – कमल भण्डारी र चेतनारायण सापकोटा। कमल भण्डारीले Raw Strength Tasmania – Sports in the Community Award 2025 प्राप्त गरे भने चेतनारायण सापकोटाले People’s Choice Award 2025 जितेका छन्।

कमल भण्डारी – खेलबाट समुदाय जोड्ने अनुहार

कमल अहिले   तास्मानियन क्रिकेट नेप्लिज एशोसिएसनका अध्यक्ष हुन्। उनी खेलमार्फत नेपाली समुदायमा एकता, सहभागिता र पहिचान निर्माण गर्दै आएका छन्। २०२१ मा तास्मानिया पुगेका उनले क्रिकेटको माध्यमबाट ‘नेप्लिज प्रिमियर लिग’ सुरु गरे, जसले नेपाली युवाहरूलाई खेलकुदमा जोड्ने ठूलो भूमिका खेल्यो। यसअघि उनले  क्रिकेट तास्मानियाबाट ‘Volunteer of the Year’ को उपाधि पनि प्राप्त गरेका थिए।

चेतनारायण सापकोटा – स्वास्थ्य सेवा र मानवताका मिसाल

चेतनारायण सापकोटा हाल Statewide Mental Health Service, Tasmania मा Clinical Nurse Consultant को रूपमा कार्यरत छन्। उनले नेतृत्व गरेको Rapid Access Service परियोजनाले डिमेन्सिया भएका वृद्धहरूलाई ग्रामीण क्षेत्रमा समयमै सेवा दिने महत्वपूर्ण काम गरिरहेको छ।उनी Admire Caremate Support Service नामक संस्थाका संस्थापक तथा CEO पनि हुन्, जसले अपांगता भएका व्यक्तिहरूको जीवनमा सकारात्मक परिवर्तन ल्याउने उद्देश्यले काम गर्दै आएको छ।

दुवै युवाले आ–आफ्नो क्षेत्रमा उदाहरणीय कार्य गरेर नेपाली समुदायको नाम उज्यालो बनाएका छन्। खेलकुद र स्वास्थ्य सेवा जस्ता फरक–फरक क्षेत्रमै उनीहरूको समर्पण, नेतृत्व र योगदानले नयाँ पुस्ताका लागि प्रेरणा दिनेछ।