रामपुर/वाग्मती प्रदेश सरकारको कृषि तथा पशुपंक्षी विकास मन्त्रालयको आर्थिक सहयोगमा निर्माण सम्पन्न भएको अत्याधुनिक Biosafety Level 3 प्रयोगशाला आज एक विशेष समारोहका बीच औपचारिक रूपमा उद्घाटन तथा हस्तान्तरण गरिएको छ। यो प्रयोगशाला भरतपुर महानगरपालिका–१५, रामपुरस्थित कृषि तथा वन विश्वविद्यालय अन्तर्गतको पशु बिज्ञान, पशु चिकित्सा तथा मत्स्य विज्ञान संकायमा स्थापना गरिएको हो। समारोहको अध्यक्षता विश्वविद्यालयका उपकुलपति डा. शारदा थपलियाले गर्नुभएको थियो भने प्रमुख अतिथि वाग्मती प्रदेश सरकारका कृषि तथा पशुपंक्षी विकास मन्त्री माननीय श्री प्रकाश श्रेष्ठ रहनुभएको थियो।
समारोहमा उपस्थित वक्ताहरूले यस अत्याधुनिक प्रयोगशालाको सुरुवातले पशु, मत्स्य, बन तथा कृषिक्षेत्रमा देखिने रोगहरूको पहिचान, निगरानी, अनुसन्धान तथा नियन्त्रणमा उच्च स्तरीय अनुसन्धानमा सहयोग पुग्ने विश्वास व्यक्त गरे। साथै वैज्ञानिक अनुसन्धान, नवीन प्रविधिको विकास, तथा दक्ष जनशक्ति उत्पादनमा प्रयोगशालाले राष्ट्रिय स्तरमै एक महत्वपूर्ण नमूना प्रस्तुत गर्ने अपेक्षा गरिएको छ।
प्रयोगशालाले आगामी दिनमा अन्तर्राष्ट्रिय मापदण्डअनुसार परीक्षण तथा प्रमाणिकरण सेवा उपलब्ध गराउने लक्ष्य राखेको छ, जसले कृषिजन्य उत्पादनको गुणस्तर सुधार गर्न सहयोग पुर्‍याउनेछ। यसले निर्यात प्रवर्द्धन, आयातमा निर्भरता घटाउने, तथा आर्थिक स्वावलम्बनमा योगदान दिने सम्भावना रहेको बताइएको छ।
उक्त Biosafety Level 3 प्रयोगशाला उच्च सुरक्षा मापदण्डमा आधारित रहेको छ जसले संक्रामक रोगहरूका नमूनाहरू सुरक्षित ढंगले परीक्षण गर्न सक्ने क्षमताको सुनिश्चितता गर्दछ। वाग्मती प्रदेश सरकारद्वारा प्रवर्द्धित यो परियोजना प्रदेशस्तरमै मात्र नभई नेपालमै पहिलो अत्याधुनिक प्रयोगशाला हो, जसले विज्ञान र प्रविधिको प्रयोगद्वारा कृषिको आधुनिकीकरण गर्ने दीर्घकालीन योजनामा सहायक बन्नेछ। कार्यक्रम संचालन Biosafety Level 3 निर्माण का संयोजक तथा बिस्व बिद्यालय का प्रा. डा. रेवन्त कुमार भट्टराई ले गर्नु भएको समारोहमा विभिन्न विश्वविद्यालयका प्राध्यापक, अनुसन्धानकर्ता, प्रदेश सरकारका उच्च अधिकारीहरू, विद्यार्थी, तथा सञ्चारकर्मीहरूको उल्लेख्य उपस्थिति रहेको थियो।