माडी/चितवन कोरिया पुनर्मिलन समाजद्वारा माडीमा गरिब तथा जेहेन्दार विद्यार्थीहरूलाई छात्रवृत्ति वितरण गरिएको छ । नयाँ शैक्षिक सत्रको सुरुवातसँगै हरेक वर्षझैं यस वर्ष पनि छात्रवृत्तिको वितरण गरिएको हो ।
समाजका सदस्य ॐ रिजालका अनुसार यसपटक चितवन जिल्लाभरिका ४२ जना विद्यार्थीलाई छात्रवृत्तिको सहयोग प्रदान गरिएको छ, जसमा माडी क्षेत्रबाट १० जना विद्यार्थी समावेश छन् । समाजले प्रत्येक विद्यार्थीलाई झोला, स्टेसनरी सामग्रीसहित नगद रु ५००० प्रदान गरेको हो ।
छात्रवृत्ति प्राप्त गर्नेहरूमा माडी माविबाट ३ जना, दिवाकर स्मृति विद्यालयबाट २ जना, खैरहनी माविबाट २ जना, बघौंडा आधारभूत विद्यालयबाट २ जना, र बह्मज्योति आधारभूत विद्यालयबाट १ जना विद्यार्थी रहेका छन् । माडी माध्यमिक विद्यालयमा सम्पन्न छात्रवृत्ति हस्तान्तरण कार्यक्रममा विद्यार्थीहरू, विभिन्न विद्यालयका शिक्षकहरू तथा अभिभावकहरूको उपस्थिति रहेको थियो ।
समाजका सल्लाहकार टंक पौडेलले कोरियामा रहेका चितवन सम्पर्क समितिको सहकार्यमा संकलित रकमलाई पुनर्मिलन समाजमार्फत छात्रवृत्तिमा रूपान्तरण गरी सहयोग गरिँदै आएको जानकारी दिनुभयो । साथै, उहाँले विद्यार्थीहरूले उक्त सहयोगको उचित सदुपयोग गर्दै उज्ज्वल भविष्य निर्माण गर्नुपर्नेमा जोड दिनुभयो ।
खैरहनी माविका प्रधानाध्यापक कुलानन्द भुसालले यस्तो सहयोगले विद्यार्थीहरूलाई सामाजिक जीवनप्रति जागरुक बनाउने र समाजसेवामा प्रेरित गर्ने बताउनुभयो । माडी माविका सहायक प्रधानाध्यापक राजन काफ्लेले “सहयोगले जीवन पूर्ण हुँदैन, तर जीवन पूर्ण बनाउन सहयोग आवश्यक हुन्छ,” भन्दै विद्यार्थीहरूलाई अध्ययनसँगै अतिरिक्त क्रियाकलापमा पनि सहभागी हुन आग्रह गर्नुभयो ।
Advertisement
