नवलपुर/हिजोआज चितवन र नवलपुरका विभिन्न क्षेत्रहरुमा बिहान बेलुका साइकलमा सवार गर्नेहरुको निकै भीड देखिन थालेको छ । लकडाउनको शुरुवाती समयदेखि नै गैंडाकोट–२ निवासी मनिष शर्मा नवलपुरको थुम्सीमा प्राय बिहानको समयमा भेटिन्छन् । युवा व्यवसायी एवं समाजसेवी मनिष शर्मा मात्र होइन उनी जस्तै दर्जनौको संख्यामा बिहान–बेलुका साइकलमा सवार गर्ने युवाहरुको भीड नै लाग्ने गर्दछ नवलपुरका विभिन्न क्षेत्रमा ।
बिहान–साँझ गरेर दैनिक ३० देखि ३५ किलोमिटर साइकलको यात्रामा लागिरहेका शर्मा चितवन र नवलपुर क्षेत्रमा होटल, रेष्टुरेण्ट, रिसोर्ट जस्ता व्यवसायमा अगाडि बढ्दै गरेका युवा हुन् । हेर्दा आकर्षक शारीरिक बनाउट, स्वस्थ देखिने शर्मालाई जोकोही पनि एक असल र मिसासिलो व्यक्तिको रुपमा लिने गर्दछन् ।
करीब ६ महिनादेखि बिहान–बेलुका साइकलको यात्रा गरेसँगै शरीर फूर्तिलो हुनुको साथै मानसिक र शारीरिक रुपमा आफूमा स्वस्थ भएको महशुस गर्नुहुन्छ शर्मा । साइकलमा यसरी हिँडिरहँदा आफूमा छुट्टै जोश, जाँगर र स्वथ्य भएको महशुस समेत हुने गरको उनको भनाई छ । साइकलको यात्रा गरेदेखि आफूले समयको महत्वलाई बुझेको र गाडी, मोटरसाइकलमा गरिने इन्धन खर्चले अन्य उत्पादन क्षेत्रमा लगानी गर्न सकिने हुँदा पनि यहाँको भौगोलिक अवस्थालाई मध्यनजर गर्दै आफूले सवारीका लागि साइकलको प्रयोग गरेको बताउँछन् ।
