भरतपुर/चितवन उद्योग संघ, महिला उद्यमी मञ्चको आयोजना तथा जिल्ला हस्तकला संघ, चितवनको सहकार्यमा १५ दिने उनीबाट हस्तकला सामाग्री बनाउने तालिमको शुरु गरिएको छ । चितवन उद्योग संघ, महिला उद्यमी मञ्चकी अध्यक्ष सृजना सोतीको अध्यक्षतामा सम्पन्न तालिम शुभारम्भ कार्यक्रममा उद्योग तथा वाणिज्य कार्यालय, चितवनका कार्यालय प्रमुख विनोद पौडेल प्रमुख अतिथि रहनु भएको थियो । प्रमुख अतिथि पौडेलले तालिममा सिकेका सीपलाई व्यवहारमा उतार्न सहभागीहरुलाई अनुरोध समेत गर्नुभयो ।
त्यस्तै विशिष्ट अतिथि चितवन उद्योग संघका कार्य वाहक अध्यक्ष मदन घिमिरेले तालिम पश्चात महिला दिदीबहिनीहरुमा सिपसँगै आत्मबल बढ्ने हुँदा तालिममा सहभागी हुँदा जिज्ञासा सहित उच्च चासोका साथ सहभागी हुन समेत आग्रह गर्नुभयो ।
चितवन उद्योग संघ, महिला उद्यमी मञ्चकी अध्यक्ष सृजना सोतीले स्वागत गर्नुभएको कार्यक्रममा तालिमको सहकार्य संस्था जिल्ला हस्तकला संघ चितवनका अध्यक्ष बुद्धि माया घलेले कार्यक्रमको उद्देश्य माथि प्रकाश पार्नुभएको थियो । तालिमलार्य प्रशिक्षकद्वय अश्मि घले र सजिता गुरुङ्गले प्रशिक्षण दिनुहुनेछ ।
चितवन उद्योग संघका प्रशासकीय अधिकृत गोविन्द प्रसाद पौडेलले सञ्चालन गर्नुभएको तालिम कार्यक्रमलाई चितवन उद्योग संघ, महिला उद्यमी मञ्चकी उपाध्यक्ष सरिता पौडेलले धन्यवाद मन्तव्य सहित समापन गर्दै प्रमुख अतिथिबाट प्रमुख प्रशिक्षकलाई तालिम सामाग्री हस्तान्तरण गरी फ्लोर हस्तान्तरण गरिएको थियो ।
Advertisement
