चितवन/नेकपा एमाले चितवनका अध्यक्ष कमलराज पाठकले भरतपुरको सिक्स लेन सडकका बारेमा रेनु दाहालले कार्यकर्तामार्फत भ्रम छरिरहेको बताएका छन् ।
पूर्व पश्चिम राजमार्ग अन्तर्गत भरतपुरको गोन्द्राङ्देखि पुल्चोकसम्मको सडकलाई सिक्स लेनमा विस्तार गरिएको छ । संघीय सरकारको बजेटमा सडक डिभिजन कार्यालयले सडक विस्तार गरेको हो ।
उक्त सडक भरतपुर महानगरपालिका र आफूले बनाएको भनि कार्यकर्तामार्फत रेनु दाहालले भ्रम छरिरहेको अध्यक्ष पाठकले बताए ।
सिक्स लेन सडकमा आज एमालेको राष्ट्रिय युवा संघ नेपाल भरतपुर महानगर कमिटीको आयोजनामा निकालिएको मोटरसाइकल र्यालीपश्चात भएको कोण सभालाई संवोधन गर्दै अध्यक्ष पाठकले सो कुरा बताएका हुन् ।
अध्यक्ष पाठकले भरतपुरको सिक्स लेन सडक केपी शर्मा ओलीले बनाएको बताउँदै यसमा रेनु दाहालले जस लिने कुनै ठाउँ नै नरहेको बताए । देशभरका राजमार्ग विस्तार गर्ने राष्ट्रिय योजना अन्तर्गत भरतपुरको पुल्चोक गोन्द्राङ् सडकखण्ड विस्तारको कामलाई तत्कालीन ओली नेतृत्वको सरकारले अघि बढाएको उनले बताए । संघीय सरकारको बजेटमा संघ अन्तर्गतको कार्यालय सडक डिभिजन भरतपुरमार्फत सडक विस्तार गरिएकाले यसमा स्थानीय सरकार र त्यसका प्रमुखले जस लिने कुनै ठाउँ नै नरहेको उनले बताएका छन् ।
तत्कालीन प्रधानमन्त्री केपी शर्मा ओलीको देशका जिल्लाका सदरमुकामहरु व्यवस्थित गर्ने योजनाअनुरुप भरतपुरमा सिक्स लेन बनेको उनको भनाइ छ ।
राष्ट्रिय परियोजना ल्याएर तत्कालीन प्रधानमन्त्री केपी शर्मा ओलीले सिक्स लेन सडक शिलान्यास गर्न आउँदा भरतपुर महानगरपालिका प्रमुख रेनु दाहालले उक्त कार्यक्रमलाई बहिष्कार गरी पिकनिक खान गएको बताउँदै उनले अहिले सडक बनेपछि जस लिन खाज्ने ? भन्दै प्रश्न गरे ।
भरतपुरको सिक्स लेन सडक नेपाल सरकारको भौतिक पूर्वाधार तथा यातायत मन्त्रालयको सडक विभाग अन्तर्गत भरतपुरमा रहेको सडक डिभिजन कार्यालयमार्फत निर्माण गरिएको हो । सडक विस्तार गर्ने योजना केपी ओली नेतृत्वको सरकारले बनाएको थियो भने र सडकको शिलान्यास पनि प्रधानमन्त्री केपी शर्मा ओलीले नै गरेका थिए । भोलि सडकको उद्घाटन पनि प्रधानमन्त्री ओलीले नै गर्देछन् ।
