नवलपरासी पूर्व/क्यान्सर जन्य रोगको उपचार गराइरहेका नगरबासीलाई गैँडाकोट नगरपालिकाले आर्थिक सहयोग गरेको छ । गैँडाकोट नगरकार्यपालिकाको ९ औँ बैठकले पालिका अन्तर्गत विभिन्न वडामा बसेका हाल क्यान्सर जन्य रोगको उपचार गराइरहेका तीन जनालाई आर्थिक सहयोग गरेको हो । गैँडाकोट नगरप्रज्ञा प्रतिष्ठानका कुलपति साहित्यकार गोविन्दराज विनोदीलाई २ लाख रुपैँया, गैँडाकोट ६ का भगवती अर्याललाई २ लाख र गैँडाकोट ८ का विपिन केसीलाई ५० हजार आर्थिक सहयोग गर्ने गत फागुन १८ गते बसेको बैठकले निर्णय गरेको थियो । गैँडाकोट नगरपालिका स्वास्थ्य शाखाका जनस्वास्थ्य निरिक्षक माधव आचार्यका अनुसार पालिका भित्र माघ मसान्तसम्ममा ५६ जना क्यान्सर जन्य रोगका विरामी रहेका छन् ।