भरतपुर/चितवन उद्योग संघ र उद्योग वाणिज्य संघ–चितवनको संयुक्त आयोजना, नेपाल विद्युत प्राधिकरण, भरतपुर वितरण केन्द्रको समन्वय तथा कोम्ट्रोनिक्स प्रा.लि.को प्राविधिक सहयोगमा उद्योगमा विद्युत खपतको मितव्ययीता र सौर्य उर्जाको नेट मिटरिङ्ग गरी वैकल्पिक प्रयोगका विषयमा अभिमुखीकरण कार्यक्रम सम्पन्न भएको छ ।
चितवन उद्योग संघका कार्य बाहक अध्यक्ष मदन घिमिरेले अध्यक्षता गर्दै स्वागत मन्तव्यसँगै कार्यक्रमको उद्देश्य माथि प्रकाश पार्नुभएको थियो । छलफल कार्यक्रममा प्राविधिक सहयोगी संस्था कोम्ट्रोनिक्स प्रा.लि.का प्रबन्ध निर्देशक रोशन सिलवालले विद्युत खपतको मितव्ययीता र सौर्य उर्जाको नेट मिटरिङ्ग गरी वैकल्पिक प्रयोगका विषयमा आफ्नो प्रस्तुति गर्नुभएको थियो ।

कार्यक्रममा समन्वय संस्था नेपाल विद्युत प्राधिकरण, भरतपुर वितरण केन्द्रका कार्यालय प्रमुख रामु श्रेष्ठले उद्योग, व्यवसायीहरुले विद्युतमा हुने खपतलाई समयानुकुल बनाउँदै न्युनिकरण गर्न सके आर्थिक भार कम गर्न सकिने बताउनुभयो ।
छलफलमा सहभागी उद्योगी, व्यवसायीहरुले उद्योग, व्यवसायमा हुने विद्युत खपत र यसलाई कसरी मितव्ययीता अपनाउन सकिन्छ र सौर्य उर्जाको नेट मिटरिङ्ग गरी वैकल्पिक प्रयोग र आर्थिक व्ययभारका विषयमा जिज्ञासा राखेका थिए । फ्लोरबाट आएका जिज्ञासाहरुलाई सम्बन्धित विज्ञहरुबाट समाधान समेत गरिएको थियो ।
चितवन उद्योग संघका प्रशासकीय अधिकृत गोविन्द प्रसाद पौडेलले सञ्चालन गर्नुभएको कार्यक्रमलाई उद्योग वाणिज्य संघ–चितवनका अध्यक्ष सुमन कुमार श्रेष्ठले धन्यवाद मन्तव्य सहित समापन गर्नुभएको थियो ।