चितवन/मध्ये नेपालकै सर्वोत्कृष्ट रेडियो कालिका एफएम, कालिका टिभि र महाकालेश्वर शिवालय मन्दिरको संयुक्त आयोजनामा बृहत भजन महोत्सव हुने भएको छ । हिन्दु धर्मालम्बीहरुको महान पर्व महाशिवरात्रीको अवसर पारेर सदाका बर्षझैं यस बर्षपनि कालिका मिडियाले बृहत भजन महोत्सव आयोजना गरेको हो । कार्यक्रम फागुन १४ गते शिवरात्रीको दिन महाकालेश्वर शिवालय मन्दिर भरतपुर १० परिसरमा हुनेछ । भजन महोत्सवमा भजन प्रतियोगिता तथा विविध कार्यक्रमहरु हुनेछन् । प्रतियोगिताको लागी नामदर्ता भइरहेको छ । हालसम्म ९ वटा टिमले नामदर्ता गराएका छन् भने फागुन १३ गतेसम्म नामदता गराउन सकिनेछ ।

स्थापनाकालदेखि धर्म संस्कृति र रितिरिवाजको संरक्षणमा लाग्दै आइरहेको कालिका एफएमले यस बर्ष पनि  मौलिक भजनहरूको संरक्षण गर्ने उद्देश्यले महोत्सव गर्न लागेको कालिका एफएमका स्टेशन म्यानेजर दिपक पौडेलले जानकारी दिनुभयो ।   प्रतियोगितामा एक समूहमा कम्तीमा पनि ५ देखि १० जना सम्म हुन पाइनेछ ।  सहभागी समूहले कम्तीमा ५ मिनेट र बढीमा ७ मिनेटको समयभित्र गीत सक्नुपर्ने हुन्छ ।  प्रतियोगितामा सहभागी मध्येबाट उत्कृष्ट  ३ श्रेणी प्राप्त गर्ने समूहलाई नगद सहित सम्मान गरिनेछ । प्रथम पुरस्कार रु. २० हजार, दोस्रो पुरस्कार रु १५ हजार र तेस्रो पुरस्कार रु. १०  हजार प्रदान गरिने एफएमले जनाएको छ । साथै सहभागी समूहलाइ प्रमाणपत्र प्रदान गरिने छ । उक्त बृहत भजन महोत्सवलाइ कालिका एफएम ९५।२ मेघाहर्ज, कालिका एफएम ९१ मेघाहर्ज र कालिका टिभिबाट समेत कार्यक्रमको दिनैभर प्रत्यक्ष प्रसारण हुनेछ ।