चितवन/महाशिवरात्रीको अवसरमा हुने बृहत भजन प्रतियोगिताको तयारी तीब्र पारिएको छ । भरतपुर महानगरपालिका वडा नम्बर १५ स्थित सरस्वती युवा क्लबको आयोजनामा शिवरात्रीको अवसरमा लमजुङ्ग चोकमा हुने उक्त प्रतियोगिताको तयारी तीब्र पारिएकोे हो । भजन प्रतियोगिताको लागि प्रचारप्रसार तीब्र तथा सचिवालय स्थापना गरिसकिएको क्लबका अध्यक्ष एवं कार्यक्रम संयोजक सुवास सिलवालले जानकारी दिनुभयो । क्लबले प्रतियोगिताको लागि जिल्ला प्रशासन कार्यालयबाट अनुमति लिईसकेको छ । सुरक्षाको लागि जिल्ला प्रहरी कार्यालय चितवनलाई आग्रह पनि गरिएको उहांँले बताउनु भयो । संयोजक सिलवालका अनुसार हालसम्म ८ वटा भजन समुहले दर्ता गरिसकेका छन । ‘हालसम्म ८ वटा भजन समुहले दर्ता गरिसक्नु भएको छ । २० वटा भजनसमुह सम्मलाई हामीले प्रतियोगितामा सहभागी गराउंँछौ । ईच्छुक भजन समुहले यथाशीघ्र सचिवालयमा आएर दर्ता गर्न आग्रह गर्दछु ।’ संयोजक सिलवालले भन्नुभयो । आयोजकले भजन समुहको लागि फागुन १० गतेसम्म समय अवधि थपेको छ । हरेक सहभागी भजन समुहलाई १० मिनेट समय निर्धारण गरिएको छ । आयोजकको निर्णय नै अन्तिम निर्णय हुने संयोजक सिलवालले बताउनु भयो । फागुन १३ गते क्लब परिषरमा हुन लागेको प्रतियोगितामा प्रमाणपत्रसहित प्रथम हुनेले नगद ३० हजार , द्धितियलाई २० हजार रुपैंया तृतीय स्थान प्राप्त गर्नेलाई १० हजार रुपैयांँ र सान्त्वना पुरस्कार स्वरुप दुईजनालाई ५ हजार रुपैंया प्रदान गरिनेछ । यस्तै सहभागी सबैलाई मायाको चिनो दिईने अध्यक्ष सिलवालले बताउनुभयो । उक्त पुरस्कार मध्ये तेस्रो पुरस्कारको सौजन्य ड्रीमलाईन ग्रुप एण्ड कम्पनीले गर्ने भएको छ । यस्तै प्रतियोगिता सम्पन्न गर्न भरतपुर– १५ ले आर्थिक सहयोगको प्रतिबद्धता गरेको सिलवालले बताउनु भयो । प्रतियोगी समुहले आवेदन शुल्क पांँचसय रुपैंया बुझाउनु पर्नेछ । प्रतियोगी समुहले शिवभत्ती भजन प्रस्तुत गर्नुपर्नेछ । हरेक समुहको प्रस्तुतीको समय १५ मिनेट रहनेछ र भजन सहितको नृत्यलाई बिशेष प्राथमिकता दिइने कार्यक्रम संयोजक शान्ति केसीले बताउनु भयो । बाध्यवाधनको सामाग्री प्रतियोगी समुह आफैंले व्यवस्था गर्नुपर्ने र आयोजकको अन्तिम नतिजानै निर्णायक हुने उहांँले बताउनु भयो । धर्म संस्कृति र सम्पदाको जर्गेना एवं संरक्षण गर्ने उद्धेश्य सहित भजन प्रतियोगिता गर्न लागिएको हो । क्लबले यसअघिपनि थुप्रै सिर्जनात्मक र सामाजिक कार्य गर्दै आएको र आगामी दिनमा पनि यस्ता कार्यक्रमलाई निरन्तरता दिंँदै जाने अध्यक्ष सिलवालको भनाई छ । वडा नम्बर १४ र १५ का युवाहरुलाई एकीकृत गरी रचनात्मक काम गर्ने उद्धेश्य सहित क्लबको स्थापना २०५० सालमा भएको थियो ।