कालिका/प्रस्तावित शक्तिखोर औद्योगिक क्षेत्रका विषयमा लगानी बोर्डका प्रमुख कार्यकारी अधिकृत र उद्योगीहरुबीच छलफल सम्पन्न भयो । सोही अवसरमा टोलीले कालिका नगरपालिका वडा नं. ८ मा रहेको नवनिर्मित कालिकाको मन्दिर र कर्णावती नदी स्नान क्षेत्रको अवलोकन समेत गरेको थियो ।
छलफल कार्यक्रममा लगानी बोर्डका प्रमुख कार्यकारी अधिकृत सुशिल ज्ञवालीले शक्तिखोर औद्योगिक क्षेत्रलाई सरकारले उच्च प्राथमिकता राखेर सञ्चालन गर्नुपर्ने बताउनुभयो । उहाँले औद्योगिक क्षेत्र निर्माणको लागि यसअघि नै केही प्रक्रियाहरु पूरा भएको र केही बाधा अप्ठ्यारा विषयहरुमा छलफलका माध्यमबाट समन्वय गरी अगाडि बढ्नुपर्ने बताउनुभयो । शक्तिखोर औद्योगिक क्षेत्र सञ्चालन गर्ने विषयमा आफूहरु सकारात्मक रहेको र केही प्राविधिक विषयहरुमा छलफलका माध्यमबाट समाधान गरिने समेत बताउनुभयो ।
त्यस्तै, कालिका नगरपालिकाका नगरप्रमुख विनोद रेग्मीले प्रस्तावित शक्तिखोर औद्योगिक क्षेत्र निर्माण गर्ने विषयमा स्थानीयस्तरमा कैयौ छलफल र भेटघाट समेत भएको र यसलाई छिटो भन्दा छिटो सञ्चालन गरी कालिका नगरपालिकालाई थप उचाईमा पु¥याउन आफूहरु पूर्ण रुपमा तयारी रहेको बताउनुभयो ।
छलफल तथा अवलोकन कार्यक्रममा लगानी बोर्डका प्रमुख कार्यकारी अधिकृत सुशिल ज्ञवाली, कालिका नगरपालिकाका नगरप्रमुख विनोद रेग्मी, चितवन उद्योग संघ, गभर्निङ काउन्सिलका अध्यक्ष भेषराज दुवाडी, संघका उपाध्यक्षहरु गजेन्द्र अधिकारी, गोपाल प्रसाद गैरे, कार्यकारी निर्देशक गणेश प्रसाद सिलवाल, कार्यसमिति सदस्य गोविन्द प्रसाद खनाल, सञ्चार अधिकृत राजु भट्ट लगायतको उपस्थिति रहेको थियो ।