भरतपुर/भरतपुरको चौबीसकोठीमा रहेको मौलाकालिका मौलाकालिका अस्पतालले आफ्नै नयाँ भवनबाट सेवा दिने भएको छ । अस्पतालले पत्रकार सम्मेलनमा गर्दै वाईपास रोडस्थित मालपोत चोक नजिक (भ्याट कार्यालयबाट उत्तर–पूर्व) नयाँ भवनबाट सेवा शुभारम्भ गर्न लागेको जानकारी दिएको हो ।
पत्रकार सम्मेलनमा बोल्दै अस्पतालका अध्यक्ष डा.माणिकलाल मानन्धरले  माघ २१ गतेदेखि ३० गतेसम्म सम्पूर्ण ओपिडि (बहिरंग) सेवाको टिकट निःशुल्क हुने जानकारी दिनुभयो ।

यसै अवधिमा अस्पतालका सम्पूर्ण सेवामा ५० प्रतिशत र औषधिमा सात प्रतिशत छुट दिएको उहाँले जानकारी दिनुभयो ।
हाल ५० शैया स्वीकृत लिएर सञ्चालनमा रहेको अस्पतालले एक सय शैया विस्तार गर्न सक्ने गरी नयाँ भवन निर्माण गरेको अस्पतालका प्रबन्ध निर्देशक डा केशव भुर्तेलले जानकारी दिनुभयो । अस्पतालमा जलन (बर्नवार्ड), प्लास्टिक सर्जरी, अंको सर्जरी (स्तन क्यान्सर), युरोलोजी, कार्डियोलोजी, स्पाईनल सर्जरी, न्यूरो सर्जरी, बाल मनोचिकित्सक सेवा सञ्चालन गर्दै आएको उहाँले उल्लेख गर्नुभयो । यसैगरी इन्टरभेन्सन पेन स्पेशलिष्ट (दुखाई विशेषज्ञ), स्त्री–प्रसुती तथा प्रजनन् रोग, एनेस्थेसिया, जनरल सर्जरी, रेडियोलोजी, जनरल मेडिसिन, हार्डजोर्नी तथा नसा रोग, नवजात शिशु तथा बालरोग, मनोरोग, दन्तरोग, यौन तथा छाला रोग सेवा दिंदै आएको छ । यस्तै फिजियोथेरापी, प्याथोलोजी (माईक्रोबायोलोजी–हेमाटोलोजी) सेवा पनि दिंदै आएको छ ।

२४ घण्टा इमर्जेन्सी र एम्बुलेन्स सेवा रहेको अस्पतालमा सामाजिक सुरक्षा कोषबाट उपचार गर्ने व्यवस्था रहेको अस्पतालका प्रबन्ध निर्देशक डा.भुर्तेलले जानकारी दिनुभयो ।
आठ शैयाको एनआईसियू, पाँच शैयाको पिआईसियू, १० शैयाको एचडियु र सात शैयाको आईसियु सेवा रहेको अस्पतालमा तीन वटा मोडुलर ओटी (आधुनिक शल्यक्रियाकक्ष) रहेका उहाँले बताउनुभयो ।
अस्पतालमा प्रयोगशाला, एक्सरे, भिडियो एक्सरे, सिटी स्क्यान, इण्डोस्कोपी, क्लोनोस्कोपी, ईको (फिटल), ईसिजी, ईईजी लगायतका सेवा समेत उपलब्ध रहेका छन् । आफ्नै फार्मेसी रहेको अस्पतालमा चौबीसी घण्टा चिकित्सक उपलब्ध हुने गरेको उहाँको भनाई छ ।