खैरहनी/तेस्रो खैरहनी महोत्सवको अवसरमा खुल्ला रोड रेस प्रतियोगिता हुने भएको छ । महोत्सव सुरू हुने अघिल्लो दिन पुस ४ गते ७ किलोमिटरको रोड रेस आयोजना गरिएको आयोजक उद्योग वाणिज्य संघ खैरहनीका सदस्य एवं खेलकुद व्यवस्थापन समिति संयोजक प्रेमनारायण जोशीले जानकारी दिए । तेस्रो खैरहनी महोत्सव पुस ५ गतेदेखि १६ गतेसम्म सञ्चालन हुँदैछ ।

महोत्सवको पूर्वसन्ध्यामा आयोजना हुने रोड रेस प्रतियोगितामा प्रथम हुनेले नगद १० हजार रूपैयाँ प्राप्त गर्नेछन् । द्वितीय, तृतीय र चौथो हुनेले क्रमशः ७ हजार, ५ हजार र एक हजार ५ सय रूपैयाँ प्राप्त गर्ने खेलकुद व्यवस्थापन समिति संयोजक जोशीले बताए । पाँचौँदेखि दसौँसम्मलाई समान एक हजार रूपैयाँ प्रदान गरिनेछ । ७ किलोमिटर दूरीमा हुने दौड प्रतियोगितामा चितवनसहित छिमेकी जिल्लाबाट पनि सहभागिता जनाउने संयोजक जोशीले बताए । खैरहनी–२, चैनपुर लदरी खोलाकिनारमा हुने महोत्सवको तयारी अन्तिम चरणमा पुगेको संघका अध्यक्ष एवं महोत्सवका संयोजक कुमार खनालले बताए ।