चितवन/तामाङ पत्रकार संघ (एटीजे) जिल्ला शाखा चितवन र रेडियो नेपालका कार्यकारी निर्देशक अमरध्वज लामालाई सम्मान गरिएको छ । तामाङ पत्रकार संघ (एटीजे) बागमती (नेवा ताम्सालिङ) प्रदेश समितिको दोस्रो अधिवेशनबाट शनिबार हेटौंडामा जिल्ला शाखा चितवन र लामा सम्मानित भएका हुन् ।
जिल्ला शाखा चितवनलाई स्थापना कालदेखि नै विभिन्न कार्यक्रम तथा गतिविधि सञ्चालन गरी तामाङ समुदायको विकास, उत्थान र परिवर्तनमा महत्वपूर्ण योगदान दिएकोले उत्कृष्ट जिल्ला शाखाको रुपमा सम्मान गरिएको हो । कार्यक्रममा तामाङ पत्रकार संघ चितवनका बबिलाल तामाङ (२०७८–२०८१ अध्यक्ष), उर्गेन तामाङ (संस्थापक अध्यक्ष), राजेश तामाङ (पूर्व सचिव) , सरस्वती लामा, सन्तोष तामाङ, विना तामाङले संयुक्त रुपमा जिल्ला शाखाको सम्मान पत्र ग्रहण गरेका हुन् ।
एटीजे जिल्ला शाखा चितवन र कार्यकारी निर्देशक लामालाई कार्यक्रमका प्रमुख अतिथि तथा हेटौंडा उपमहानगरपालिका प्रमुख मीना लामा र एटीजे बागमती प्रदेशका अध्यक्ष अर्जुन पाख्रिनले संयुक्त रुपमा सम्मान गरेका थिए । यस्तैगरी अधिवेशनमा समन्वयकारी भूमिका निर्वाह गर्ने तामाङ पत्रकार संघ मकवानपुर शाखालाई कदर पत्रसहित सम्मान गरिएको थियो । कार्यक्रम जिल्ला समन्वय समिति मकवानपुरको सभाहलमा सम्पन्न भएको हो ।
