भरतपुर, ३२ साउन/चितवनको भरतपुर हाल मेडिकल सिटीको रुपमा विकास भईरहेको अवस्थामा यहाँ दिनानुदिन अस्पताल खुल्ने र त्यहाँ सेवारत डाक्टरहरुको क्रियाकलापका कारण बेलाबेलामा निकै चर्चा पाईरहेको हुन्छ ।
भरतपुरमा रहेको चितवन मेडिकल कलेजले नेपाल सरकारले गरेको लकडाउनको समयमा समेत आफ्नो अस्पतालमा आउने बिरामीहरुको उपचारलाई कुनै कसुर बाँकी नराखी सेवा प्रदान गरेकै कारण अस्पतालमा आउने बिरामीहरुका आफन्तहरु खुशी हुने गरेका छन् । अझ अस्पतालमा कार्यरत डाक्टर, नर्सहरुले बिरामी प्रति गर्ने व्यवहारको कारणले समेत अस्पताल निकै चर्चामा रहेको छ ।
चितवन मेडिकल कलेजमा २०७७ बैशाखबाट आफ्नो सेवा आरम्भ गर्नुभएका सालिन व्यक्तित्व, मिजासिलो स्वभावका धनी, युवा जुझारु डा.बसन्त गौलीप्रति उहाँले बिरामी प्रति गरेको आत्मीयता, केयरिङ्गका कारण आईसियूमा आउने बिरामीका आफन्तहरु निकै खुशी देखिन्छन् ।
भारतीय चिकित्सा विज्ञान संस्थान, नयाँ दिल्लीबाट क्रिटिकल केयर मेडिसिनमा डिएम, पिजिआई पोष्ट ग्रयाजुएट इन्टिच्यूट चन्डीगढबाट एनेस्थेसिया एवं क्रिटिकल केयरमा एमडि गर्नुभएका गौलीले ग्रान्डी अस्पताल काठमाण्डौंमा क्रिटिकल केयरमा दुई वर्ष काम गरिसक्नु भएको हो । उहाँ हाल चितवन मेडिकल कलेजको आईसियू विभागमा कार्यरत हुनुहुन्छ ।
पहिला पहिला अस्पतालमा धेरैले दुःख पाएको गुनासोहरु सुनेको र अहिले आफू आफ्नै बुबाको उपचारको लागि चितवन मेडिकल कलेजमा आईसियूमा उपचार गरिरहँदा त्यहाँ उपचाररत डाक्टर, नर्सहरुले गर्ने व्यवहारप्रति आफू सन्तुष्ट भएको भरतपुर–१० निवासी रोशन श्रेष्ठले बताउनुभयो । त्यस्तै डा.गौली प्रति इंकित गर्दै श्रेष्ठले भन्नुभयो –उहाँजस्तै डाक्टरहरुको अभाव थियो, म उहाँको कामले निकै प्रभावित भएको छु । उहाँ लगायत उहाँको टिमले गरेको व्यवहारप्रति धेरै बिरामीहरुका आफन्त खुशी भएको समेत श्रेष्ठले बताउनुभयो ।
