तमूस्यो ह्युल छोंज धीं गुरूङ महिला राष्ट्रिय परिषद् चितवनको अध्यक्षमा सीतादेवी गुरूङ निर्वाचित भएकी छन् । शनिबार भरतपुरस्थित महाबौद्ध गुम्बा तीनखोलेमा भएको सातौं जिल्ला अधिवेशनमा भारी मतसहित सीतादेवी गुरूङ निर्वाचित भएकी हुन् । कूल खसेको ४९ मतमध्ये सीतादेवीको पक्षमा ३७ र उनको प्रतिद्वन्द्वी पूर्णकुमारी गुरूङको पक्षमा जम्मा १२ मत खसेको थियो ।
संस्थाको विधानअनुसार गाउँपालिकाबाट अध्यक्षसहित सात जना, नगरपालिकाबाट अध्यक्षसहित ९ जना र महानगरपालिकाबाट अध्यक्षसहित १३ जनाले मतदान गरेका थिए । त्यसबाहेक जिल्ला कार्यसमितिका पदाधिकारीसहित सबै सदस्यले मतदान गर्न पाउने व्यवस्थाअनुसार निर्वाचनमा जम्मा ५८ जनाले मतदान गर्न पाउने व्यवस्था थियो । तर, मतदान कार्यमा ४९ जना मात्रै सहभागी भएको निर्वाचन मण्डलकी संयोजक शारदादेवी गुरूङले जानकारी दिइन् । सहमतिमा आउन नसकेपछि अन्तिममा अध्यक्ष पदको लागि निर्वाचन भएको हो ।
अध्यक्षबाहेक अरू सबै पदमा सर्वसम्मत भएको थियो । तीन वर्षे कार्यकालको लागि उपाध्यक्षमा कमला गुरूङ, सचिवमा गोमा गुरूङ, संगठन सचिवमा कविता गुरूङ, प्रचार सचिवमा कल्पना गुरूङ, कोषाध्यक्षमा ज्योति गुरूङ र सहकोषाध्यक्षमा चन्दा घले चयन भएका छन् ।
यस्तै कार्यसमिति सदस्यहरुमा भने रूपा गुरूङ, मसिना गुरूङ, लक्ष्मी घले, आइतुमाया गुरूङ, विष्णु गुरूङ, सुकमाया गुरूङ, दुर्गा गुरूङ, अनिता गुरूङ, अनिता गुरूङ र सीता गुरूङ चयन भएका छन् । विधानअनुसार शनिबारको अधिवेशनमा १७ सदस्यीय कार्यसमिति चयन गरेको हो । तीन जना सदस्य अध्यक्षले पछि थप मनोनित गर्न मिल्ने व्यवस्था छ ।
महानगर समितिमा पुनः मञ्जु
तमूस्यो ह्युल छोंज धीं गुरूङ महिला राष्ट्रिय परिषद् भरतपुर महानगर समितिको अध्यक्षमा पुनः मञ्जु गुरूङ चयन भएकी छन् । शनिबार सम्पन्न संस्थाको पाँचौँ अधिवेशनबाट तीन वर्षे कार्यकालको लागि नयाँ नेतृत्व चयन गरेको हो । संस्थाको उपाध्यक्षमा आशु गुरूङ, सचिवमा सङ्गीता गुरूङ, संगठन सचिवमा चिनीमाया गुरूङ, प्रचार सचिवमा श्रीकला गुरूङ, कोषाध्यक्षमा फरिदाकुमारी गुरूङ र सहकोषाध्यक्षमा जानुका गुरूङ चयन भएका छन् ।
यस्तै कार्यसमिति सदस्यहरुमा भने हीरा घले, सन्तु गुरूङ, चन्द्रकुमारी गुरूङ, धनु गुरूङ, विनु गुरूङ, आशा गुरूङ, सीतामाया गुरूङ र शान्तामाया गुरूङ चयन भएका छन् । महाबौद्ध गुम्बा तीनखोलेमा सम्पन्न अधिवेशनबाट १५ सदस्यीय कार्यसमिति सर्वसम्मतरूपमा चयन भएका हुन् ।
