चितवन/सेवा विस्तारलाई तीब्रता दिएको वीपी कोइराला मेमोरियल क्यान्सर अस्पतालमा पछिल्लो पटक रक्त क्यान्सर भएका बिरामीहरुको प्रकार परीक्षण शुरु गरिएको छ । यस अघि यो परीक्षणका लागि नमूना काठमाण्डौं वा भारत पठाईदै आएकोमा उपकरण खरिद गरी जनशक्तिलाई तालिम दिएर यही परीक्षण शुरु गरिएको हो । अस्पतालका उपनिर्देशक डा.उमेश नेपालले रक्त क्यान्सरका प्रकार परीक्षण गर्ने ‘फ्लो साईटोमेट्रि सेवा’ शुरु भएको बताउनुभयो । यसका लागि आवश्यक पर्ने उपकरण रु.१ करोड ५० लाखमा खरिद गरिएको भन्दै उहाँले जनशक्तिलाई तालिम दिएपछि सेवा शुरु गरिएको बताउनुभयो ।

अस्पतालले एक जना डाक्टर र एक जना प्राविधिकलाई भारतको टाटा मेमोरियल क्यान्सर अस्पतालमा तालिमका लागि पठाईएको उपनिर्देशक डा. नेपालले जानकारी दिनुभयो । तालिमप्राप्त जनशक्ति र उपकरण आएपछि सेवा नियमित गरिएको उहाँको भनाई छ । बाहिर पठाउँदा रु.३० हजारभन्दा बढी खर्च हुने गरेकोमा यहाँ परीक्षण हुँदा रु.१२ हजार मात्रै लाग्ने गरेको छ । अस्पतालमा रक्त क्यान्सरका बिरामी धेरै हुने भएकाले बिरामीलाई सहज भएको कार्यकारी निर्देशक पौडेलको भनाई छ ।