चितवन/ ब्लड डोनर्स सोसाइटी नेपालले आगामी तिहारको अवसरमा मौलिक देउसी-भैलो कार्यक्रम आयोजना गर्ने तयारी गरेको छ । यस कार्यक्रमको मुख्य उद्देश्य नेपाली मौलिक संस्कृतिको जगेर्ना गर्नुका साथै “एक घर एक रक्तदाता” अभियानलाई समाजमा व्यापक बनाउनु हो । यो अभियानले समाजका हरेक घरमा रक्तदानप्रति जागरुकता र इच्छाशक्ति अभिवृद्धि गर्ने अपेक्षा लिएको छ ।

यस कार्यक्रम चितवन जिल्लाका विभिन्न स्थानहरूमा सम्पन्न हुने बताइएको छ, जहाँ स्थानिय संस्कृतिका झल्को दिने झाँकीहरू र पारम्परिक देउसी-भैलो प्रस्तुत गरिनेछ । ब्लड डोनर्स सोसाइटीले आफ्नो सामाजिक उत्तरदायित्वअन्तर्गत रक्तदानको महत्त्व बुझाउन तथा समुदायलाई एकजुट गर्न यो सांस्कृतिक गतिविधिको माध्यमलाई अपनाएको हो । साथै, यस संस्थाले विगतदेखि नै समाजमा विभिन्न किसिमका सामाजिक कार्यहरू गर्दै आएको छ। रक्तदानका कार्यक्रम, स्वास्थ्य शिविर र विभिन्न सचेतनामूलक कार्यक्रमहरूलाई निरन्तरता दिँदै यो संस्था समाज सुधारको दिशामा सक्रिय रहँदै आएको छ । तिहारको यस अवसरमा आयोजना गरिने देउसी-भैलोले स्थानीय समुदायमा न्यानो आत्मीयता सँगै रक्तदानप्रति सजगता फैलाउने विश्वास गरिएको छ ।