नेप्से ट्रेडिङ डटकम (nepsetrading.com) र सनि सेक्युरिटीज ब्रोकर नं. ४२ को सहकार्यमा चितवनको भरतपुरस्थित स्माट बैंक्वेट रिसोर्टमा एकदिने शेयर तालिम भव्य रूपमा सम्पन्न भएको छ। यस तालिमको मुख्य उद्देश्य नेपाली शेयर बजारमा सक्रिय रूपमा लगानी गर्ने व्यक्तिहरूको ज्ञान र क्षमता अभिवृद्धि गर्नु थियो। नेपालका विभिन्न क्षेत्रहरूबाट आएका सयौँ लगानीकर्ताहरूले यस तालिममा उत्साहजनक उपस्थिति जनाएका थिए।

प्राविधिक विश्लेषणमा विशेष दक्षता राख्ने सन्दीप कुमार चौधरीले चार्ट पढ्ने कला, ट्रेन्डलाइनहरूको महत्त्व, र विभिन्न टेक्निकल इन्डिकेटरहरूको प्रयोग गरी बजारको गतिविधि अनुमान गर्ने तरिकाहरू सिकाए। अनुभवी लगानीकर्ता केशव कोइराला (काका) ले फण्डामेन्टल विश्लेषणको प्राथमिकता र महत्त्वलाई उजागर गर्दै कम्पनीका वित्तीय प्रतिवेदनहरूको विश्लेषण र दीर्घकालीन लगानीका रणनीतिहरूमा मार्गदर्शन प्रदान गरे।

डाटा विश्लेषक तथा नेप्से ट्रेडिङका संचालक अंगत सिटौलाले शेयर बजारमा डाटाको प्रयोग र विश्लेषणको महत्त्वबारे जानकारी दिँदै ठोस निर्णय लिने विधिहरूमा प्रशिक्षण दिए। नेप्से ट्रेडिङका संचालक दिपेश घिमिरेले नेपालभर यस्ता तालिमहरू आयोजना गर्ने योजना रहेको बताए। “काठमाडौं बाहिर पनि यस्ता तालिमहरू लिएर जाने योजना छ,” घिमिरेले बताए।

ब्रोकर नं. ४२ चितवन शाखा प्रमुख उज्वल पाैडेलले चितवनमा लगानीकर्ताको बढ्दो संख्याले यस्ता तालिमहरू आयोजना गर्न प्रेरित गरेको उल्लेख गरे । तालिममा सहभागी लगानीकर्ताहरूले शेयर बजारको गहिरो ज्ञान प्राप्त गरेको बताउँदै यस कार्यक्रमले उनीहरूको लगानी क्षमतामा सुधार ल्याएको प्रतिक्रिया दिए। सहभागीहरूले शेयर बजारमा जोखिमको सही व्यवस्थापन सिक्न पाउँदा आत्मविश्वास बढेको बताए।