चितवन/श्रीराधाकृष्ण मन्दिर भरतपुर ४ शिवघाटको आयोजनामा आजदेखि सप्ताहब्यापी ज्ञान महायज्ञ सुरु भएको छ । बिहान ७ बजे कलश यात्रा सहित सुरु गरिएको कार्यक्रममा विभिन्न क्षेत्रबाट धार्मिक व्यक्तित्वहरुको सहभागीता रहेको थियो । गैंडाकोटका पिठाधीस श्री हरिशरण उपाध्यायको अध्यक्षतामा भएको कार्यक्रममा पूर्व प्रतिनिधिसभा सदस्य अञ्जनी श्रेष्ठको प्रमुख आतिथ्यता रहेको थियो ।
११ गतेसम्म संचालन हुने उक्त महायज्ञमा श्रीधाम वृन्दावन परमतपस्वी सन्तश्री भागवतशरण महाराजको प्रमुख वाचकत्व र पं. श्री अक्लेश केशवशरण अर्यालको मुखारबिन्दबाट प्रवचन भोलिदेखि सुरु हुनेछ । २०१९ सालदेखिको इतिहास बोकेको उक्त राधाकृष्ण मन्दिरको थप स्तरोन्नति सहित विशाल मन्दिर निर्माणका लागि महायज्ञ गर्न लागिएको कार्यक्रम संयोजक इन्जिनियर नमराज फुयाँलको भनाइ छ । उक्त कार्यक्रममा २ करोड ५० लाखको आम्दानी हुने अनुमान आयोजकले लिएको छ ।
बिहान ७ बजेदेखि सुरु भएको कलश यात्रा राधाकृष्ण मन्दिरबाट शिवघाट चोक हुँदै, नारायणी किनार र पुनः मन्दिरमा आएर सम्पन्न भएको थियो । उक्त कलश यात्रामा झन्डै ५०० जनाको सहभागीता रहेको थियो ।
भोलि कात्तिक ५ गते बिहान ७ बजेबाट ८ बजेसम्म मण्डप पुजन, रुद्राभिषेक, पाठपारायण, सङ्किर्तन सहित कात्तिक ११ गते हवन, तिलार्चनगरी महायज्ञ समापन हुनेछ ।
