चितवन/किसानका समस्या समाधानमा राज्यको भूमिका स्वदेशी बस्तुको प्रयोग र उत्पादनमा जोडदिन गर्नुपर्ने काम आदिका बारेमा कालिका एफएमले किसानसंग पैरवी गरेको छ । कालिका एफएमले आफ्नो वार्षिकोत्सवको साताव्यापी कार्यक्रम अन्तर्गत आज छैटौंदिन किसानसंग कालिका संचालन गरेको हो ।

कार्यक्रममा पहिलो वक्ताको रूपमा बोल्दै चितवन दुग्ध सहकारी संघका अध्यक्ष किशोर बगालेले घाँस खेतीमा आधारित पशुपालनमा जोड दिनुपर्ने बताउनुभएको छ । राज्यले हालसम्म गरेको लगानी उदेश्यबिहिन भएको भन्दै उहाँले किसानका समस्यामा राज्य उदासीन भएको बताउनुभएको हो । बिगत लामोसमयदेखिको अझैपनि दुग्ध किसानहरुले दुधको भुक्तानी पाउन नसकेकोमा दुखेसो पोख्नुभयो । राज्य सम्यन्त्र कमजोर बन्दा स्वदेशी बस्तु तथा सेवाले राम्रो बजार समेत नपाएको उल्लेख गर्नुभयो ।

यसैगरी चितवन नवलपुर कुखुरापालक संघका अध्यक्ष दिपक पाण्डेले पोल्ट्री व्यवसाय अहिलेको अवस्थामा धरासायी बन्दै गएको बताउनुभएको छ । चाडबाडका समयमा समेत नेपालमा भारतीय कुखुराको नै बढी माग हुने गरेको बताउनुभयो । चितवन नवलपुरमा ह्याचरीहरु समेत आर्थिक अभावमा बिस्थापित हुँदै गएकोप्रति चिन्ता व्यक्त गर्नुभयो । बिदेशबाट आउने बस्तुको रोक लगाउन राज्यले नसक्दा स्वदेशी बस्तुले मूल्य नपाएकोप्रति राज्यलाई गम्भीर बन्न आह्वान गर्नुभयो । त्यस्तै अर्का किसान बेलबहादुर गुरुङले खगेरी सिचाइ सेवाको स्तरोन्नति नहुँदा चितवनका किसान प्रभावित हुने गरेको बताउनुएको छ । कृषि औजार र मलको अभाव हुने गरेको उहाँको भनाइ थियो ।

यसैगरी मौरीपालक किसान करुणा सागर सुवेदीले मौरीपालक किसानहरुले समेत अरु बिधाका किसानले जस्तै समस्या भोग्नुपरेको दुखेसो पोख्नुभएको छ । मौरी चरण क्षेत्रको समस्या, बजारीकरणको अभाव, बिषादीको बढ्दो प्रयोग, प्रतिस्पर्धायुक्त बजार आदिका कारण यो व्यवसाय दिनप्रतिदिन खस्कदै गएको जिकिर गर्नुभयो ।

नेपालमा हालसम्म १२ हजार मौरीपालक किसानहरु रहेका छन् । बजार नपाउदा महपालक किसानहरु चिन्तित बनेको उहाँको भनाइ छ । कार्यक्रममा बोल्ने अधिकांश किसानहरुले स्वदेशी बस्तुको प्रवर्द्धनमा जोड दिनुपर्ने बताएका छन् । उक्त कार्यक्रममा चितवन नवलपुरका विभिन्न कृषि बिधाका किसानहरुको सहभागीता रहेको छ ।

नेपालमा व्यवसाय मध्ये कठिन र चुनौतीका रूपमा लिइएको कृषि पेशाको मुख्य समस्या भनेको आम्दानी भन्दा खर्च बढी, बजारीकरणमा समस्या, दक्ष जनशक्ति र स्रोत साधनको कमी अहिलेपनि विद्यमान छ । यिनै कुराहरुलाई मध्येनजर गर्दै किसानका समस्या समाधानमा राज्यले गर्नुपर्ने काम र मिडियाले खेल्नुपर्ने भूमिकाका विषयमा किसानसंग कालिका एफएमले पैरवी गरेको हो । भोलि कालिका एफले अन्तर कर्मचारी खेलकुद सम्बन्धि कार्यक्रम संचालन गर्दैछ ।