काठमाडौ/देशको प्रतिष्ठित एवं ठूलो रिटेल चेन भाटभटेनी पछिल्लो समय व्यवसाय (शाखा) विस्तारमा आक्रामक देखिएको छ । कम्पनीले पोखराको तलचोकमा सुपरमार्केट खोल्न भवन शिलान्यास गरेको साता नबित्दै चितवनमा पनि भवनको शिलान्यास सम्पन्न गरेको छ । भाटभटेनी ग्रुपका अध्यक्ष मीनबहादुर गुरुङ र उनकी धर्मपत्नी सावित्री गुरुङले चितवनको टाँडीमा बन्ने भवनको बुधबार शिलान्यास गरेका हुन् । यसअघि सोमबार गुरुङ दम्पत्तिले पोखराको तालबाराहीमा भवनको शिलान्यास तथा भूमिपूजा गरेका थिए ।
टाँडीमा खुल्ने भाटभटेनीको २८औं शाखा हुनेछ । टाँडीमा दुईवटा भवन बन्ने र यो हालसम्मकै सबैभन्दा ठूलो हुने मीनबहादुरले जानकारी दिएका छन् । ३ लाख २२ हजार वर्गफिट क्षेत्रफलको उक्त भवन १ अर्ब ५० करोड रुपैयाँ लागतमा तयार हुने बताइएको छ । हाल सञ्चालनमा रहेकामध्ये सबैभन्दा ठूलो भाटभटेनी भवन इटहरीमा छ । इटहरी भाटभटेनीको क्षेत्रफल २ लाख ९५ हजार वर्गफिट छ । त्यसपछिको ठूलो वीरगन्जमा छ । वीरगन्ज भाटभटेनीको क्षेत्रफल २ लाख ९० हजार वर्गफिट छ ।
रत्ननगर नगरपालिकामा पर्ने टाँडीको भवनका लागि भाटभटेनी ग्रुपले ४ बिघा जमिन किनेको छ । दुवै भवन ७ तलाका हुने बताइएको छ । यसमा सिनेमा हल, बैंक, फुडकोर्ट, प्लेग्राउन्ड लगायतको सुविधा हुनेछ । टाँडीको भाटभटेनी पर्यटक लक्षित हुने पनि अध्यक्ष गुरुङले जानकारी दिएका छन् । भाटभटेनी समूहले २२ हजार जनाभन्दा बढीलाई रोजगारी दिएको छ ।
