चितवन/साहित्यकार संजीव पौडेलले साहित्य क्षेत्रप्रति युवाहरूको रुचि बढाउनुपर्ने बताउनुभएको छ । कालिका एफएमसंग संक्षिप्त कुराकानी गर्नुहुँदै पौडेलले स्थानीय पाठ्यक्रममा समेत साहित्य क्षेत्रलाई समाबेश गर्नुपर्ने बताउनुभएको हो । उहाँले थुप्रै कविता कथा र उपन्यास समेत लेखिसक्नुभएको छ । हालैमात्र ‘छोटु’ नामक उपन्यास समेत प्रकाशन गर्नुभएका पौडेलले राज्यले समेत नेपाली साहित्य कलाको सम्मान गर्न नसकेको बताउनुभयो । देश र समाजको परिवर्तनकारी भूमिकामा नेपाली साहित्यले खेलेको भूमिकाको स्मरण गर्दै उहाँले राज्यले आजैदेखि साहित्यमा ठूलो लगानी बढाउनुपर्ने तर्क गर्नुभयो ।

बि.स. २०१९ सालमा भरतपुर १० चितवनमा जन्मनुभएका संजीव पौडेलले पहिलो कृति प्रकाशनमा ल्याउनुभएको हो । उक्त कृतिमा उहाँको पारिवारिक अबस्थासंगै बदलिँदो समाजको यथार्थ विवरणलाई कृतिमा समेट्नुभएको छ । एक हजार प्रति प्रकाशन भएको उक्त ‘छोटु’ नामक कृतिमा २७५ पृष्ठ रहेको छ ।

जसमा आरम्भ, पारिवारिक अबस्था, वैवाहिक स्थिति, मेरी आमा, वाल्यकाल, पढ्न पाउदाको खुशी, झन्नै जाँच दिन पाइन, मितेरीको कुरा, विद्यार्थी युनियनको कुरा, इन्जिनियर बन्ने रहर, प्रेम र विवाह, शिक्षण सेवा र हिरा सतहको बास जस्ता विषयसूचीहरु सहभागी रहेका छन् । उक्त कृतिको मूल्य रु. ४०० रुपैयाँ राखिएको छ ।