चितवन/कालिका एफएम र महाकालेश्वर शिवालय मन्दिरको संयुक्त आयोजनामा आज एक कार्यक्रमकाबीच महाकालेश्वर मन्दिरको सरसफाइ गरिएको छ । मन्दिर व्यवस्थापन समिति, कालिका एफएम परिवार र जुनियर अधिकृत प्रहरी तालिम केन्द्रको सहभागीतामा सरसफाइ गरिएको हो । बि.स. २०४३ सालमा भरतपुर १० स्थित कालिका मार्गमा स्थापना भएको उक्त महाकालेश्वर मन्दिरमा विशेषगरी दशैं, शिवरात्री पर्व, साउनको सोमबार र हरितालिका तीजका दिन भक्तजनहरुको घुइँचो लाग्ने गरेको मन्दिरका पुजारी कालिका प्रसाद सापकोटाले बताउनुभयो ।
विशेषगरी यस मन्दिरको दर्शन गर्नाले रोगब्याधी दुखकष्ट नाश हुने, परिवारमा सुख-शान्ति र समृद्धि छाउने, मनोकामना सिद्ध हुने धार्मिक जनबिश्वास छ । यहाँ १०८ शिव लिङ्ग, शिव पञ्चायन, राधाकृष्ण, गणेश र हनुमानको मूर्ति रहेको छ । चितवन सहित देशका विभिन्न छिमेकी जिल्लाबाट समेत श्रद्धालु भक्तजनहरु मन्दिरको दर्शन गर्न आउने गरेको मन्दिरका पुजारी सापकोटाले जानकारी दिनुभयो ।
