खैरहनी/चितवन उद्योग संघ, खैरहनी पालिका समितिको छैंटौं बार्षिक साधारण–सभा सम्पन्न भएको छ । चितवन उद्योग संघ, खैरहनी समितिका अध्यक्ष युवराज पाठकको अध्यक्षतामा सम्पन्न कार्यक्रममा खैरहनी नगरपालिकाका नगर प्रमुख शशीकुमार खनियाँ प्रमुख अतिथि रहनुभएको थियो ।
प्रमुख अतिथि खनियाँले उद्योगधन्दाको विकास विना राष्ट्रको आर्थिक समृद्धि नहुने भएकोले उद्योगहरुलाई निर्वाद रुपमा सञ्चालन गर्न राष्ट्रले उद्योगमैत्री नीति ल्याउनु पर्ने बताउनुभयो ।
त्यस्तै विशिष्ट अतिथि, चितवन उद्योग संघ तथा चितवन औद्योगिक विकास साकोसका अध्यक्ष सूर्य प्रसाद न्यौपानेले खैरहनी क्षेत्रमा स्थापना उद्योगहरुले यस क्षेत्रमा रोजगारीसँगै आयआर्जनमा टेवा पुग्ने हुँदा उद्योग क्षेत्रको विकासका लागि स्थानीय सरकारको सहयोग अपरिहार्य रहेको बताउनुभयो ।
साधारणसभाको अवसरमा चितवन उद्योग संघका पूर्व अध्यक्ष भेषराज दुवाडी, उद्योग वाणिज्य संघ खैरहनीका अध्यक्ष कुमार खनाल, इलाका प्रहरी कार्यालय खैरहनीका प्रमुख श्रीराम तिमिल्सिना, सम्पूर्ण पालिका समितिको तर्फबाट चितवन उद्योग संघ, रत्ननगर पालिका समितिका अध्यक्ष उमाकान्त पौडेलले शुभकामना मन्तव्य राख्नुभएको थियो ।
चितवन उद्योग संघ, खैरहनी पालिका समितिका उपाध्यक्ष बद्रीनाथ पोखरेलले स्वागत मन्तव्य राख्नुभएको कार्यक्रममा चितवन उद्योग संघ, खैरहनी पालिका समितिका अध्यक्ष युवराज पाठकले बार्षिक कार्य प्रगति प्रतिवेदन प्रस्तुत, चितवन उद्योग संघ, खैरहनी पालिका समितिका कोषाध्यक्ष लक्ष्मी थापा खरालले आर्थिक प्रतिवेदन प्रस्तुत गर्नुभएको थियो ।
अध्यक्षले प्रस्तुत गर्नुभएको वार्षिक प्रगति प्रतिवेदन र कोषाध्यक्षले प्रस्तुत गर्नुभएको आर्थिक प्रतिवेदन माथि छलफल र अनुमोदन गरिएको थियो ।
साधारणसभाको अवसरमा दोश्रो तीज विशेष उद्यमशिल एक्स्पो तथा ब्यापार मेला–२०८१ मा गीत प्रतियोगितामा तेश्रो हुन सफल सहभागीहरुलाई प्रमुख अतिथिबाट प्रमाणपत्र वितरण गरिएको थियो ।
चितवन उद्योग संघ खैरहनी पालिका समितिका सचिव प्रकाश बस्नेतले सञ्चालन गर्नुभएको कार्यक्रमलाई चितवन उद्योग संघ, खैरहनी पालिका समितिका उपाध्यक्ष बुद्धिराज बिसुरालले धन्यवाद मन्तव्य सहित कार्यक्रम समापन गर्नुभएको थियो ।
https://www.youtube.com/watch?v=xPq2NN11zKU&t=8s
Advertisement
