चितवन/चितवन मेडिकल कलेज (सिएमसी)मा कार्यरत हाडजोर्नी तथा मेरुदण्ड रोग विशेषज्ञ डा. तेज प्रकाश दवाडीले चितवनमा सबैभन्दा बढी घुँडाको जोर्नी खिइने समस्या देखिएको बताउनुभएको छ । कालिका एफएमको कार्यक्रम (सिएमसी) स्वास्थ्य सरोकारमा संक्षिप्त कुराकानी गर्नुहुँदै डा. दवाडीले ५० बर्ष भन्दा माथिका उमेर समूहमा हाडजोर्नी र नशाको दुखाई बढी हुने गरेको बताउनुभएको हो । अधिकांश मानिसहरूमा भिटामिन (डि)को अभाव भएरपनि हातखुट्टा दुख्ने र झमझमाउने गरेको बताउनुभयो । करिब २० प्रतिशत मानिसमा कुनै न कुनै खालको जोर्नीको समस्या हुन सक्ने अध्ययनहरुले देखाएको समेत डा. दवाडीले जानकारी दिनुभयो ।

संसारभरी विभिन्न अस्पतालमा गरिएका अनुसन्धानका आधारमा हरेकवर्ष जस्तो घुँडा र अन्य जोर्नीको समस्या लिएर आउने बिरामीको चाप बढ्दो छ । जोर्नी र घुँडा दुख्ने अनेकौं कारणमध्ये घुँडाको हड्डी खिइनु मुख्य कारण हो । जसलाई ओस्टियोआर्थराइटिस भनिन्छ र प्राय: बुढ्यौलीको रोग पनि भनिन्छ जुन महिलामा र अधिक वजनका मानिसमा बढी देखिने गरेको डा. दवाडीको भनाइ छ ।

चोटपटक बाथ आदिका कारण समेत हाडजोर्नी मेरुदण्ड  र नशाको समस्या लिएर चितवन मेडिकल कलेजमा दिनमा दैनिक ४५ देखि ६५  जनासम्म आउने गरेका छन् । गर्मी याममा भन्दाबढी यस्तो समस्या जाडोयाममा अझ बढी हुने गरेको पाइन्छ । घुँडामा हुने तरल पदार्थ चिसोका कारण जम्ने हुँदा मांशपेशीमा समेत समस्या देखा पर्ने गरेको हो । भने केही मानिसहरुमा अत्यधिक भारी काम गर्दा घुँडा या ढाड दुख्ने तथा घर्षणका कारण घुँडा खिइने र  ढाडकम्मर दुख्ने, नसा च्यापिने जस्ता समस्या देखिने गर्छ ।