चितवन/चितवन माछा पालन र उत्पादनका क्षेत्रमा उपयुक्त मानिन्छ । यहाँका अधिकांश मानिसहरु कृषि पेशामा निर्भर रहँदै आएका छन् । जिल्लामा वर्षमा झन्डै ६ हजार ४० टन भन्दा बढी माछा उत्पादन हुँदै आएको मत्स्य व्यवसायी संघ चितवनका सचिब लुलाराज तामाङले जानकारी दिनुभयो ।
चितवनमा उत्पादन भएको माछा जिल्लाको माग धानेर ठूलो परिमाणमा देशका प्रमुख सहरमा पुगिरहेकोले जिल्लालाई माछामा आत्मनिर्भर घोषणा गरिएको सचिब लुलाराज तामाङले बताउनुभयो । तामाङका अनुसार, चितवनमा मात्रै दैनिक एक मेट्रिक टन भन्दा बढी माछा भारतबाट आउने गरेको छ ।
लामो समयसम्म ताजा देखाउन फर्मलिन नामको औषधि राखेर भारतीय माछा नेपाली बजार आइपुग्ने गरेको उहाँले बताउनुभयो । चितवनमा ७ सय हेक्टर क्षेत्रफलमा माछा उत्पादन भइरहेको छ । माडी नगरपालिकामा मात्रै १ हजार २ सय ४६ वटा पोखरी रहेको संघको तथ्यांकमा उल्लेख छ ।
भरतपुर महानगरमा ६ सय ८, रत्ननगरमा २ सय ३०, खैरहनीमा २ सय ३२, राप्तीमा ६१ वटा पोखरी रहेको छ । तरपनि यो बीचमा स्थानीय उत्पादन एकदम कम भएका कारण बितरणमा समस्या देखिन थालेको सचिब तामाङको भनाइ छ । संघले गरेको मूल्यनिर्धारण भन्दा किसानले आँफूखुशी आफ्नै मूल्य राखेर बिक्रीवितरण गर्दा यस्तो समस्या सिर्जना हुन थालेको हो । चितवनमा कार्प प्रजातिका रघु, कमन कार्प, ग्रास, सिल्भर, ब्रिगेड नामका माछा बढी उत्पादन हुँदै आएको छ । पछिल्लो समय चितवनमा जलकपुर नामको माछा पालनमा कृषकको आकर्षण बढ्दै गएको देखिन्छ ।
