तनहुँ /सूर्य नेपाल प्रालिले दमौली अस्पतालाई शनिबार दुई थान डायलाइसिस मेसिन प्रदान गरिएको छ । कम्पनीका जनसम्पर्क प्रमुख अन्जन दवाडीले दमौली अस्पतालका प्रमुख डा.परिवर्तन बराललाई मेसिन हस्तान्तरण गर्नुभएको हो । अस्पतालमा हाल दश वटा डायलाइसिस मेसिन पुगेको छ । आठ वटा मेसिनले दैनिक ५६ जना बिरामीको डायलाइसिस गरिएको अस्पतालका प्रमुख डा.बरालले जानकारी  दिनुभयो । उहाँका अनुसार कम्पनीले करिब रु.२८ लाख मूल्य बराबरको मेसिन सहयोग गरेको हो । एक वटा मेसिनले दिनमा तीन जना बिरामीको डायलाइसिस गर्न सकिन्छ,उहाँले भन्नुभयो “मेसिन पर्याप्त भएपछि बिरामीले डायलाइसिसका लागि पालो कुर्नुपर्ने अवस्थाको अन्त्य भएको छ ।”

डायलाइसिस गर्न पालो चाँडो चाँडो आउँने हुँदा बिरामीको उपचारमा सहज भएको छ । डायलाइसिसको लागि पालो पर्खिनुपर्ने र पोखरा जानुपर्ने बाध्यताको अन्त्य भएको छ, डा.बरालले भन्नुभयो । उक्त कार्यक्रममा तनहुँ क्षेत्र नं १ का प्रतिनिधी सभासदस्य डा.स्वर्णिम वाग्लेको समेत उपस्थिति रहेको थियो । साँसद वाग्लेको व्यक्तिगत पहलमा मेसिन प्राप्त भएको डा.बरालले जानकारी दिनुभयो । मेसिन हस्तान्तरण कार्यक्रममा दमौली अस्पतालका अध्यक्ष शान्तिरमण वाग्ले,प्रमुख जिल्ला अधिकारी जनार्दन गौतम,प्रहरी प्रमुख एसपी अपिल बोहरा,रास्वपाका नेताहरु बिश्व बास्तोला,चूडामणि दाहाल लगायतको सहभागिता रहेको थियो । राष्ट्रिय मिर्गौला उपचार केन्द्र काठमाडौंले २०७२ साल मङ्सिरमा दमौली अस्पतालमा डायलाइसिस सेवा सुरूवात गरेको थियो । उक्त केन्द्रले विसं ०७९ सालमा उपकरण र कर्मचारीसहित डायलाइसिस सेन्टर अस्पताललाई हस्तान्तरण गरेपछि अहिले अस्पतालको स्वामित्वमा संचालन हुदै आएको सो अस्पतालले जनाएको छ ।