भरतपुर/चितवन उद्योग संघले आयोजना गरेको ३५ औं स्थापना दिवसको अवसरमा शुभकामना मन्तव्य राख्ने अधिकांश पूर्व अध्यक्षहरुले स्थापना दिवसले संस्थामा आफूले नेतृत्व गर्दाको विगतका दिनहरुको स्मरण गराएको बताएका थिए ।
चितवन उद्योग संघका कार्यवहाक अध्यक्ष गजेन्द्र अधिकारीको अध्यक्षतामा सम्पन्न कार्यक्रममा संघका पूर्व अध्यक्षहरु राजु पौडेल, भेषराज दुवाडी, हरि प्रसाद सुवेदी, सोमराज महरठ्ठा, तारा प्रसाद पौडेल, गुणाकर खरेल, दिलबहादुर ताम्राकारले शुभकामना सहित आ–आफ्ना कार्यकालमा भएका महत्वका परियोजना, संघ सञ्चालनका क्रममा आईपरेका समस्या र त्यसका समाधानका लागि गरिएको पहलहरुको विषयमा जानकारी गराएका थिए । पूर्व अध्यक्षहरुले शुभकामना मन्तव्य सहित उद्यमी उत्प्रेरणामूलक, संस्थागत सम्बन्ध र संघको प्रतिनिधित्वका लागि गर्नुपर्ने भूमिका लगायतका विषयमा आफ्ना भनाईहरु राखेका थिए ।
३५ औं संघ दिवसको अवसरमा युवा उद्यमी मञ्चका निर्देशक भरत दवाडी, महिला उद्यमी मञ्चकी अध्यक्ष सृजना सोती, खैरहनी समितिका अध्यक्ष युवराज पाठक, माडी समितिका सचिव जीताराम महतो, इच्छाकामना समितिका उपाध्यक्ष गोविन्द जमरकट्टेल, चितवन मसाल उत्पादक संघका पूर्व अध्यक्ष विक्रम सापकोटा, बागमती प्रदेश उद्योग परिसंघ, महिला उद्यमी मञ्चकी अध्यक्ष चन्दना कोइराला, पूर्व कार्यसमिति क्लवका अध्यक्ष बद्री प्रसाद अधिकारीले समेत शुभकामना मन्तव्य राखेका थिए ।