चितवन/राप्रपाका केन्द्रिय वरिष्ठ उपाध्यक्ष रविन्द्र मिश्रले राप्रपा देशको अस्तित्वको लागि लडिरहने पार्टी भएको बताउनुभएको छ । भरतपुर १० रिजालचोकस्थित राप्रपाको पार्टी कार्यालयमा आज भएको कार्यक्रममा प्रशिक्षण दिनुहुँदै नेता मिश्रले यस्तो बताउनुभएको हो । त्यस्तै उहाँले केही दलहरु स्वार्थको राजनीति गरेर देशको अस्तित्व माटोमा मिलाउन लागेको तर्कगर्दै यस्ता दलहरुलाई परास्त गर्नुपर्ने बेला भएको बताउनुभयो ।
देशको शासकीय स्वरुपलाई कुरुपमा परिणत गराएकोप्रति कटाक्ष गर्दै नेता मिश्रले आफ्नो मौलिकतालाई बिर्सिएर नेताहरू पश्चिमी शैलीको प्रभावमा परेको समेत बताउनुभयो । राप्रपा जहिले र जहाँपनि हिन्दुराज्य सहितको राजसंस्था निर्माण गर्न सधैं प्रतिबद्ध भएको उल्लेख गर्नुभयो । सदनमा सधैं दरिलो र खरो प्रश्न गर्दै आइरहेको एकमात्र पार्टी राप्रपा भएको भन्दै उहाँले जनताका समस्याहरुलाई समाधान गराएर देशलाई निकास दिने बताउनुभयो । राष्ट्रियता, प्रजातन्त्र र उदारवादको सिद्धान्तमा राप्रपा सधैं प्रतिबद्ध भएको हुँदा आम नागरिकहरुलाई ढुक्क भएर राप्रपाको संगठनमा मिसिन आह्वान समेत गर्नुभयो ।
