माडी/माडीको बसन्तपुरमा नायक पल शाह र गायिका समिक्षा अधिकारी सहितका चर्चित राष्ट्रिय कलाकारहरुले दर्शक नचाउँने भएका छन् । माडी कला केन्द्र बसन्तपुरले आयोजना गरेको माडी साँस्कृतिक तथा पर्यटन उत्सव-२०८१ अन्तरगत नायक शाह र गायिका अधिकारी सहित गायक प्रमोद खरेल, प्रकाश सपुत, शान्तिश्री परियार, बद्री पंगेनी, रामजी खाँड, ज्योति मगर, एलिना चौहान र र्यापर जिबब लगायतको प्रस्तुति रहने भएको हो । मंगलबार माडीको बसन्तपुरस्थित जक्सन क्याफेमा पत्रकार सम्मेलन आयोजना गरी कला केन्द्रले सो जानकारी दिनुभयो । पत्रकार सम्मेलनमा उत्सवको समग्र उद्देश्य, महत्व र विस्तृत कार्यक्रम बारेमा सम्बन्धमा कला केन्द्रका अध्यक्ष हरिकृष्ण लामिछाने र मेला मूल आयोजक समिति संयोजक पदम विलाश पन्तले जानकारी गराउनुभएको थियो ।
बसन्तपुरको खुल्ला चौरमा आउँदो बैशाख १३ गते देखि २१ गतेसम्म सञ्चालन हुने महोत्सवमा बिभिन्न ब्यवसायीक प्रतिष्ठानका १ सय भन्दा बढी स्टलहरु रहने माडीका धार्मिक पर्यटन क्षेत्र र माडीमा रहने सबै समुदायको रीतिरिवाज झल्किने संस्कृति प्रर्दशन गर्ने छुट्टै स्टलहरू रहने आयोजकले जनाएको छ । उत्सवमा माडी डान्स आइडल, ब्याड मिन्टन, बाल उद्यान लगायतका मनोरञ्जनात्मक प्रतियोगिता रहनेछन् । माडी भित्र र बाहिर गरी करिब ४० हजार दर्शकहरुले उत्सवको अवलोकन गर्ने र एक करोड बराबरको कारोबार हुने आयोजकको आँकलन छ । उत्सव अवलोकनका लागि विद्यार्थीहरुलाइ ५० रुपैया र अन्य व्यक्तिहरुका लागि ८० रुपैयाको टिकट शुल्क निर्धारण गरिएको छ भने ज्येष्ठ नागरिकहरुलाई निःशुल्क प्रवेशको व्यवस्था गरिएको जनाइएको छ ।