चितवन/राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङ्देनले देशको व्यवस्था र अवस्था बदल्न पार्टीले देशव्यापी अभियान थालनी गरेको बताउनुभएको छ । राप्रपा चितवन क्षेत्र नं. १ ले आयोजना गरेको क्षेत्रिय बिशाल आमसभामा संबोधन गर्दै अध्यक्ष लिङ्देनले यस्तो बताउनुभएको हो । त्यस्तै उहाँले चर्को मिटरव्याज र ऋणले जनता आत्महत्या गर्न बाध्य भएको बताउनुभएको छ ।
देशको बिकास निर्माण र आयोजनाहरु अलपत्र हुँदा निर्माण व्यवसायीहरुले समयमा नै भुक्तानी नपाएको बताउनुभएको छ । त्यस्तै अध्यक्ष लिङ्देनले ४३ दिन राप्रपा सरकारमा भएका बेला देशमा ४ खरवको बिजुली आपूर्ति गराएर अर्थतन्त्रलाई चलायमान गराएको बताउनुभयो । देश इतिहासकै जन्जिर मोडमा रहेको बताउदै अध्यक्ष लिङ्देनले सबै नेताहरु एकढिक्का र मिलेर लाग्नुपर्ने तर्क गर्नुभयो । राप्रपाले उठाएको मुद्दा देशका लागि अपरिहार्य भएको उद्धरण गर्दै लिङ्देनले देशको अहिलेको व्यबस्था नै खराब भएको बताउनुभयो ।
देश बिकासको लागि अब जनताले जनताद्वारा कार्यकारी प्रधानमन्त्री चुन्नुपर्ने व्यबस्था बसाल्न राप्रपा अडिग रहेको बताउनुभयो । आफ्ना मान्छे पोस्न र पाल्नको लागि बनाइएका राष्ट्रियसभा र प्रदेससभा खारेज गर्नुपर्ने समेत बताउनुभयो । २०४६ सालपछिका ठुलठुला दलका नेताहरुको सम्पत्ति छानबिन गर्नुपर्ने बताउदै लिङ्देनले धर्म संस्कृति हिन्दुराज्य स्थापित गराउन राप्रपा प्रतिबद्ध बनेको समेत धारणा राख्नुभयो ।
