भरतपुर/बाग्लुङ जिल्ला साविक मुलपानी गा.वि.स वडा नम्वर ९, हालको बाग्लुङ नगरपालिका वडा नम्वर ७, गैह्रागाउँ, धुँवाखोलामा वि.संं. १९५८ भाद्र कृष्ण जन्माष्टमीका दिन पिता वाचस्पती र माता छायाँ कुमारीका जेष्ठ सुपुत्रको रुपमा जन्मीनु भएका हयगृव दत्त पन्तको जीवनी, व्यक्तित्व र कृतित्वका सम्वन्धमा धवलागिरी बहुमुखी क्याम्पस बाग्लुङले अनुसन्धान गर्ने भएको छ । स्व.पन्तका कान्छा छोरा यादव प्रसाद पन्तको अध्यक्षतामा बुधवार भरतपुरमा आयोजित एक पारिवारीक समारोहमा धवलागिरी बहुमुखी क्याम्पसको अनुसन्धान व्यवस्थापन समितिको तर्फबाट सहप्राध्यापक डा. सुदर्शन सिलवाल र पन्त परिवारका तर्फबाट हुतराज पन्त, लेखराज पन्त र सन्तोष पन्तले संयुक्त रुपमा सहमति पत्रमा हस्ताक्षर गर्नु भएको थियो । उक्त कार्यक्रमका अध्यक्ष तथा त्रीभूवन विश्व विद्यालयका सेवा निवृत्त सहप्राध्यापक यादव प्रसाद पन्तले वि.सं. २०३२ जेष्ठ शुक्ल चतुर्दशीका दिन देहावसान हुनु भएका पिताको वारेमा अनुसन्धान गर्न पहिले देखि नै सोचि रहेको भए पनि समय नजुरेको बताउनु हुँदै धवलागिरी बहुमुखी क्याम्पसले अनुसन्धानमा सक्रियता देखाएकोमा आभार प्रकट गर्नु भई अनुसन्धानमा हर तरहले सहयोग गर्ने बचनवद्धता प्रकट गर्नु भयो । उक्त कार्यक्रममा सहमति पत्रकावारेमा जानकारी गराउनु हुदै सहप्राध्यापक डा.सिलवालले त्रीभूवन विश्व विद्यालयको केन्द्रिय पुस्तकालयमा स्व. हयगृव पन्तका वारेमा भएको केहि जानकारी र विश्व विद्यालयका विद्धान प्राध्यापकहरुले उहाँको वारेमा गरेको चर्चाले अनुसन्धान गर्न आवश्यक देखि क्याम्पसको अनुसन्धान व्यवस्थापन समितिले अनुसन्धान गर्न सुरु गरेको वताउँदै स्व. हयगृव दत्त पन्तको ज्योतिषीय ज्ञान, आयुर्वेद सम्वन्धि ज्ञान, श्रीमद् भागवत लगायतका धार्मिक सांस्कृतिक ग्रन्थहरुको ज्ञान, विविध कला र साहित्य तथा सोबाट समाजले प्राप्त गरेका उपलब्धीका वारेमा अनुसन्धान गरि करिव एक वर्ष भित्र अनुसन्धान प्रतिवेदन क्याम्पसले परिवार जनलाई उपलब्ध गराउने गरी समय तालिका निर्धारण भएकोले परिवारजनले पूर्ण सहयोग गर्नु पर्ने कुरा बताउनु भएको थियो ।
रमापति वंशका धरोहरको जीवनी र कृतिका सम्वन्धमा अनुसन्धान हुन लागेकोमा खुशी व्यक्त गर्दै स्व. पन्तका भतिजा रत्ननगर निवासी हुतराज पन्तले आफुले अनुसन्धान सफल गराउन कुनै कसर बाँकी नराख्ने कुरा प्रकट गर्नु भयो भने पं. हयगृव दत्त पन्तका नाती तथा भरतपुर महानगरपालिका वडा नम्वर १२ का वडा अध्यक्ष लेखराज पन्तले हजुरवुवाको योग्यता, क्षमता र समाजलाई पु¥याएको योगदान बारे आफुले केहि देखेको र धेरै सुनेको भए पनि आधिकारीक दस्तावेज नहुँदा आफुलाई चिन्तीत बनाई रहेकोमा अनुसन्धान सुरु हुनु आफैमा महत्वपूर्ण कार्य भएको र आफुले अनुसन्धान प्रतिवेदन प्राप्त भए पछि सो को छपाई गरी समाजमा जानकारी गराउने कुरा बताउनु भयो । उक्त कार्यक्रम सञ्चालन गर्नु भएका स्व. पंडितका नाती सन्तोष पन्तले विद्धान पुर्खाहरुको जीवनी, व्यक्तित्व र कृतित्वलाई पुस्तान्तरण गर्दै अग्रजहरुको योगदानलाई सम्मान गर्ने समाज निर्माण गर्न यो कार्यक्रम र अनुसन्धान कोसेढुङ्गा सावित भई भविष्यमा यस्ता अनुसन्धान भई रहन सहयोग पुग्ने र यो अनुसन्धान प्रतिवेदन र सो पश्चात छपाई हुने पुस्तक समग्र पाठकहरुका लागि पठनिय र संग्रहणीय दस्तावेज हुने कुरामा विश्वास व्यक्त गर्नु भएको थियो ।