देवघाट/पवित्र तीर्थस्थल देवघाटमा माघेसङ्क्रान्ति मेला व्यवस्थापनको तयारी पूरा भएको छ । हरेक वर्ष माघेसङ्क्रान्तिका दिन त्रिशूली र कालीगण्डकीको संगमस्थल देवघाटको वेणीमा स्नान गर्ने भक्तजनको घुइँचो लाग्ने गर्छ । देवघाट क्षेत्र विकास समितिले शनिबार पत्रकार सम्मेलनको आयोजना गरी माघेसङ्क्रान्ति मेलाको तयारी पूरा भएको जानकारी दिएको हो ।
यसवर्षको माघेसङ्क्रान्तिमा करिब पाँच लाख भक्तजन देवघाट पुग्ने अनुमान गरिएको देवघाट क्षेत्र विकास समितिका कार्यकारी निर्देशक तथा माघेसङ्क्रान्ति मेला व्यवस्थापन समितिका सदस्यसचिव सदन बरालले बताउनुभयो । गत वर्षको माघेसङ्क्रान्तिका दिन करिब साढे दुई लाख भक्तजन पुगेका थिए । कोरोना महामारीपछिको हरेक मेला–महोत्सवमा मानिसको संख्या झन्डै दोब्बरले बढेकाले देवघाटमा पनि यसपटक गत वर्षभन्दा दोब्बर भक्तजन पुग्ने अनुमान गरिएको बरालले बताउनुभयो ।
पुस मसान्त अर्थात् आज बिहान वेणी–संगममा धार्मिक विधिअनुसार लिङ्गो गाडेपछि माघेसङ्क्रान्ति मेला शुभारम्भ हुन्छ । मेला व्यवस्थापनका लागि चितवन, तनहँु र नवलपरासी (बर्दघाट सुस्तापूर्व)का प्रमुख जिल्ला अधिकारी, प्रहरी प्रमुख, स्थानीय सरकार लगायतका विभिन्न निकायसँग समन्वय गरिएको बरालले जानकारी दिनुभयो ।
माघेसङ्क्रान्तिका दिन रामनगर, ठिमुरा र दासढुङ्गाबाट देवघाट प्रवेश गर्ने र वागीश्वरी हुँदै आँपटारी भएर फर्कने व्यवस्था मिलाइएको छ । देवघाटमा साना सवारीसाधन पार्किङका लागि सीताराम संस्कृत माविको कम्पाउन्ड र ठूला सवारीसाधनलाई दाहसंस्कार प्रवेशद्वारअगाडि पार्किङ स्थलको व्यवस्था गरिएको उहाँले बताउनुभयो । पार्किङ गर्दा साइकलको १० रूपैयाँ, मोटरसाइकलको २० रूपैयाँ, कार/जिप/भ्यानको ५० रूपैयाँ र ठूला सवारीसाधनको १०० रूपैयाँ शुल्क उठाउने समितिको योजना छ ।
नदी वारपार गर्दा डुङ्गा र ¥याफ्टिङको एकतर्फी भाडा ५० रूपैयाँ निर्धारण गरिएको छ । आकस्मिक उद्धारका लागि दुईवटा काठका डुङ्गा, सशस्त्र प्रहरी बल विपद् व्यवस्थापन शिक्षालय कुरिनटार र नेपाली सेनाको नयाँ सबुज गणबाट गरी दुई/दुईवटा ¥याफ्टिङ डुङ्गाको व्यवस्था गरिएको देवघाट क्षेत्र विकास समितिका सूचना अधिकारी पुष्पराज पौडेलले जानकारी दिनुभयो ।
मेलामा सुरक्षा व्यवस्था मिलाउन बागमती प्रदेश प्रहरीबाट १७८ जना, जिल्ला प्रहरी कार्यालयबाट १०० जना, ५० जना सशस्त्र र ३० भन्दा बढी नेपाली सेना परिचालन हुनेछन् । तनहुँतर्फबाट करिब १४५ जना सुरक्षाकर्मी परिचालन गरिने छ । झोलुङ्गे पुलमा एकपटकमा सय जनालाई एकतर्फीरुपमा प्रवेश अनुमति दिइने देवघाट क्षेत्र विकास समितिका अध्यक्ष भिम बहादुर रानाको जानकारी दिनुभयो । झोलुङ्गे पुल जीर्ण भइसकेकाले माघेसङ्क्रान्तिलाई मध्यनजर गरी दुई महिनाअघि मर्मत भइसकेको अध्यक्ष रानाको भनाइ छ ।
गलेश्वर आश्रमका पिठाधिश स्वामी आत्मनानन्द गिरीजी महाराजले झोलुङ्गे पुलमा भक्तजनको चाप घटाउन नदीमा चल्ने डुङ्गाको शुल्क घटाउन सुझाव दिनुभयो । जीर्ण भइसकेको झोलुङ्गे पुलमा भक्तजनको प्रवेश अत्यधिक हुन पुगे अप्रिय घटना हुन सक्ने भन्दै यसतर्फ विशेष सचेत हुन उहाँले मेला व्यवस्थापन समितिलाई आग्रह गर्नुभयो । ‘झोलुङ्गे पुलमा भक्तजनको भार पर्ने देखिन्छ । नदीमा चल्ने डुङ्गाको शुल्क घटाउन सके पुलको भार कम गर्न सकिन्छ’, उहाँले भन्नुभयो ।
