सौराहा/सौराहामा १७ औं चितवन हात्ती तथा पर्यटन महोत्सव २०८० हुने भएको छ । क्षेत्रीय होटल संघ सौराहाको आयोजनामा हुन लागेको सो महोत्सव आउँदो पौष १० गतेदेखि १४ गतेसम्म चित्रसारीको चौरमा हुँदैछ । प्रत्येक बर्ष हुँदै आइरहेको सो महोत्सव बिगतका केही बर्षहरुमा कोरोना कहरका कारण हुन सकेको थिएन । फलस्वरूप यसको असर पर्यटन लगायतका सबै क्षेत्रमा देखिन थालेपछि सुस्ताएको अर्थतन्त्रलाई पुनः चलायमान गराउन महोत्सवको आयोजना गरिएको आयोजकले जनाएको छ ।

विश्व सम्पदा सुचिमा परेको चितवन राष्ट्रिय निकुञ्जको माध्यमबाट पर्यटकहरुलाई थप आकर्षण गराउँदै सौराहा र चितवनको पर्यटन क्षेत्रको बिकासमा सो महोत्सव कोसेढुङ्गा साबित हुने १७ औं चितवन हात्ती तथा पर्यटन महोत्सवका कार्यक्रम संयोजक ओम प्रकाश पाण्डेले बताउनुभयो । उहाँका अनुसार, ५ दिनसम्म संचालन हुने महोत्सवमा हात्तीको शृङ्गार प्रतियोगिता, हात्ती वन भोज, मैत्रीपूर्ण खेलकुद प्रतियोगिता, चितवनमा पर्यटनको सम्भावना र चुनौती विषयक अन्तरक्रिया र स्थानीय कला र संस्कृतीको प्रबर्द्धन जस्ता विषयहरु नै महोत्सवको थप आकर्षण रहेको र झन्डै ५ लाख भन्दा बढी बाहिय तथा आन्तरिक पर्यटकहरु महोत्सव अबलोकनका लागि आउने बिश्वास आयोजकले लिइएको छ ।