चितवन/प्रेस चौतारी चितवनको सदस्य एवम् कुशल प्रस्तोता पूजा परियारले वैवाहिक वार्षिकोत्सवको सन्दर्भ पारेर प्रेस चौतारी चितवनको भवन निर्माणका लागि आर्थिक सहयोग गरेकी छिन् । ८ औँ वैवाहिक वार्षिकोत्सवको सन्दर्भमा स्वर्गीय श्रीमान् प्रवुद्ध परियारको स्मृती सञ्चारकर्मी परियारले चौतारी चितवनको भवन निर्माणका लागि २० हजार सहयोग गरेकी हुन् । उनले भवन निर्माण लागि सहयोग गर्ने चाहाना पहिल्यैदेखि रहेको भन्दैं श्रीमानको समेत स्मृति हुने गरी वैवाहिक वार्षिकोत्सवको पारेर सहयोग गरेको वताइन् ।
प्रेस चौतारीको देश कै पहिलो भवन चितवनमा बन्न लागेको प्रति खुसी भएको भन्दै सञ्चारकर्मी परियारले आफूहरुको सपना चाँडै नै पुरा हुने विश्वास ब्यक्त गरिन् । प्रेस चौतारी चितवनको भवन निर्माणमा आर्थिक सहयोग जुटाउन गरिएको वृहत सांस्कृतिक तथा साहित्यिक कार्यक्रमको प्रस्तोतासमेत रहेकी परियार हाल युएईमा रहेकी छिन् । लमजुङ्गबाट पत्रकारिता सुरु गरेकी परियारले शिलापत्र अनलाइनदेखि चितवनमा सिनर्जी एफएम लगायतका विभिन्न सञ्चारमा काम गरिसकेकी छिन् ।
प्रेस चौतारी चितवनका अध्यक्ष सुवास पण्डितले चितवनमा रहेर संगठनको हरेक गतिविधीमा सक्रिय रहेर काम गरेकी परियारको सहयोगले संगठनलाई थप उर्जा मिलेको बताए । चितवनको भरतपुर–११ बसेनीमा निर्माण हुँदै गरेको भवनको देशभरका सञ्चारकर्मीहरुका लागि ओत लाग्ने छहारी हुने अध्यक्ष पण्डितले बताए । समाजसेवी केशव कार्कीले प्रदान गरेको ९ धुर जग्गामा चौतारी चितवनको भवनका काम धमाधम भैरहेको छ । भवनको दोस्रो तलाको ढलान विहिवार भोली गर्ने कार्यक्रम तय भएको छ । पहिलो तलाको काम फिनिसिङ्ग गर्ने काम सुरु भएको छ । भवनको पहिलो तलामा कार्यालय कक्ष, दोस्रोमा हल र तेस्रो तलामा आवासिय कोठाहरु रहनेछन् । भवनको लागत १ करोड ५० लाख अनुमान गरिएको छ ।
