चितवन, तनहुँ र नवलपुरको सङ्गमस्थल पवित्र धार्मिक तीर्थस्थल देवघाटमा साढे तीन करोडका योजना निर्माण शुरु गरिएको छ । समितिले आफ्नो कार्यक्षेत्र तनहुँ, चितवन र नवलपुरमा रु तीन करोड ४९ लाखका योजना निर्माणको काम शुरु गरेको हो । तनहुँको देवघाट गाउँपालिका–५ तर्फ रु ७० लाख, चितवनको भरतपुर महानगरपालिका–१ तर्फ रु दुई करोड ५४ लाख र नवलपुरको गैँडाकोट नगरपालिका–२ तर्फ रु २५ लाखका योजनाको काम शुरु भएको क्षेत्र विकास समितिका अध्यक्ष शिवराज पौडेलले जानकारी दिनुभयो ।
योजना निर्माणका लागि गण्डकी प्रदेश सरकार, वाग्मती प्रदेश सरकारले आर्थिक सहयोग गरेको छ । समितिका अध्यक्ष पौडेलका अनुसार गण्डकी प्रदेशगत तथा गाउँपालिकागत योजनाबाट रु १५ लाखको लागतमा टाउनचोकबाट गलेश्वर आश्रम मार्ग ढलान, सामाजिक विकास मन्त्रालयको रु सात लाखको लागतमा देवघाट समाज कल्याण केन्द्रको कम्पाउण्ड वाल निर्माण, देवघाट गाउँपालिकाको रु १५ लाखको लागतमा कार्यालय भवनमाथि ट्रस निर्माणकार्य शुरु गरिएको छ । त्यस्तै क्षेत्र विकास समितिको पूँजीगत योजनाबाट रु १५ लाखको लागतमा धार्मिकमार्ग निर्माण तथा स्तरोन्नति, रु छ लाखको लागतमा मणिमुकुन्देश्वर उद्यान व्यवस्थापन, रु सात लाखको लागतमा हरिहरचोकबाट महेशमार्ग ढलान, रु एक लाखको लागतमा निर्मित संरचना मर्मत, रु दुई लाखको लागतमा सूर्य पञ्चायन मन्दिर र रु दुई लाखको लागतमा देवघाट कालिका मन्दिर निर्माण सुधारकार्य शुरु गरिएको छ ।
चितवनतर्फको क्षेत्रमा वाग्मती प्रदेशबाट सशर्त अनुदानतर्फ प्राप्त रु ८० लाखले छ, प्रदेश मन्त्रालयबाट प्राप्त रु एक करोड ६२ लाखले तीन र समितिको पूँजीगततर्फका रु १२ लाखले छ योजना निर्माण शुरु गरिएको छ । सबै योजना चालू आवकै असार मसान्तभित्र सम्पन्न गर्ने लक्ष्य लिइएको छ । चितवनतर्फ प्रहरी चौकी अगाडीको दाहसंस्कारतर्फ रहेको गल्छी नियन्त्रणका लागि रु २५ लाख, रामजानकी बालिका आश्रम भवन निर्माणका लागि रु १५ लाख, रामजानकी गार्गी कन्या गुरुकुलम स्नानगृह तथा शौचालय निर्माणका लागि रु १० लाख, दाहसंस्कारस्थलमा सार्वजनिक शौचालय निर्माणका लागि रु १० लाख, बागेश्वरी समावेशी गुरुकुलम भवन मर्मतका लागि रु १० लाख र वैदिक धर्मशाला नजिकको चौतारी पुनःनिर्माणका लागि रु १० लाख विनियोजन भएको छ ।
त्यस्तै देवघाट कल्पवास पदमार्ग निर्माणका लागि रु एक करोड, सार्वजनिक शौचालय निर्माणका लागि रु ४० लाख, दाहसंस्कारतर्फ पहिरो नियन्त्रणका लागि रु २२ लाख, सत्य साइकेन्द्र ट्रस निर्माणका लागि रु तीन लाख, एनआरएनए वृद्धाश्रम कम्पाउण्ड निर्माणका लागि रु तीन लाख, बागीश्वरी गौसंरक्षण केन्द्रका लागि रु दुई लाख, रामनगर माध्यमिक विद्यालय सुधार एवं स्तरोन्नतिका लागि रु एक लाख, रामजानकी गार्गी कन्या गुरुकुलम सुधार एवं स्तरोन्नतिका लागि रु दुई लाख र आमा कल्याण समाज कृष्ण मन्दिर सुधार एवं स्तरोन्नतिका लागि रु एक लाख बजेट विनियोजन भएको छ ।
नवलपुरतर्फ गण्डकी प्रदेश सरकारबाट प्राप्त रु १० लाखले मौलाकालिका केलादी सिँढीमार्ग निर्माण, समितिको पूँजीगत योजनाबाट रु एक लाखको लागतमा मनकामना आमा समूहको मन्दिर स्तरोन्नति, रु चार लाखको लागतमा गङ्गाधाममार्ग निर्माण, रु तीन लाखको लागतमा जग्गा संरक्षण, रु दुई लाखको लागतमा फिरी, हर्दीमार्ग निर्माणका काम शुरु भएको छ । यी सबै योजना चालू आव असार मसान्तभित्र सम्पन्न गर्ने लक्ष्य राखिएको समितिका अध्यक्ष पौडेलले बताउनुभयो । “असार मसान्तभित्र सम्पन्न गर्ने सङ्कल्पसहित निर्माण कम्पनीसँग सम्झौता भएको छ”, पौडेलले भन्नुभयो, “साना केही योजनाबाहेक अरु सबै योजना बोलपत्र प्रक्रियाबाटै ठेक्का लागेको हो ।” रासस
Advertisement
