राजु भट्ट/जेष्ठ २२
भरतपुर/चितवन उद्योग संघले भरतपुर महानगरपालिकालाई स्वदेशी उद्योगहरुको प्रबद्र्धनमा सहयोग पुग्ने गरी महत्वपूर्ण विषय वस्तुलाई समाविष्ट गरी नीतिगत राय सुझाब तथा महानगरको राजश्व परामर्श समितिलाई सुझाव पेश गरेको छ । चितवन उद्योग संघका अध्यक्ष राजु पौडेलले भरतपुर महानगरपालिकाकी प्रमुख रेनु दाहाललाई उक्त सुझाव पत्र पेश गर्नुभएको थियो ।
चितवन उद्योग संघका उपाध्यक्ष युगराज वस्तीले प्रोजेक्टरबाट प्रस्तुत गर्नुभएको सुझाव पत्र माथि छलफल समेत गरिएको थियो । भरतपुर महानगरपालिकाका, प्रमुख प्रशासकीय अधिकृत प्रेमराज जोशीले संघले प्रस्तुत गरेको सुझाव निकै महत्वपूर्ण र सान्र्दभिक रहेको बताउनुभयो ।
पेश गरिएका सुझाब पत्रमा आ.व. २०७७÷०७८ को नीति तथा कार्यक्रम र बजेट मार्फत सम्बोधन हुँदा नयाँ उद्यमी सिर्जना हुने, नेपाली उद्योगहरुको प्रबद्र्वनमा सहयोग पुग्ने, थप रोजगारी सिर्जना हुने तथा महानगरको राजश्व बृद्धिमा समेत सहयोगी हुने र नेपाल सरकारले तय गरेको आर्थिक समृद्धिको लक्ष्य हासिलमा प्रभावकारी हुने भएकोले भरतपुर महानगरपालिकाको आ.व.२०७७÷०७८ को नीति तथा कार्यक्रम र बजेट मार्फत सम्बोधन गराउन समेत संघले सुझाव पत्र मार्फत अनुरोध गरेको छ ।
सुझाव पत्र पेश कार्यक्रममा भरतपुर महानगरपालिकाकी प्रमुख रेनु दाहाल, चितवन उद्योग संघका अध्यक्ष राजु पौडेल, प्रमुख प्रशासकीय अधिकृत प्रेमराज जोशी, उपसचिव प्रद्युम्न प्रसाद उपाध्याय, संघका उपाध्यक्षहरु त्रिलोचन कँडेल, मदन घिमिरे, दुर्गाप्रसाद भण्डारी, युगराज वस्ती, कार्यकारी निर्देशक गणेशप्रसाद सिलवाल, कार्यसमिति सदस्य गोपाल प्रसाद गैरे, सञ्चार अधिकृत राजु भट्टलगायतको उपस्थिति रहेको थियो ।
