गोविन्द घिमिरे

गैँडाकोट,१७ जेठ/ छिमेकी मुलुक भारत सहित तेस्रो मुलुकबाट नगरवासीहरु घर फर्कन थालेपछि गैँडाकोट नगरपालिकाले क्वारेन्टिन निर्माणलाई तिव्रता दिएको छ।गैडाकोट नगरपालिकाको कार्यपालिका बैठकले गठन गरेको क्वारेन्टिन ब्यवस्थापन समितिले विभिन्न सरकारी विद्यालयहरुको पहिचान गरि क्वारेन्टिन निर्माण गरेको छ ।

हालसम्म ५ वटा विद्यालय र एउटा कभर्डहलमा क्वारेन्टिन निर्माण गरि भारतबाट आएका नगरवासीलाई व्ववस्थापन गरिएको नगरप्रमुख छत्रराज पौडेलले जानकारी दिए । नेपाल राष्ट्रिय शम्सेर आर्दश मावि, एसपीएम कलेज, नारायणी मावि, मुकुन्दशेन कर्भडहल भेडाबारी, जनशक्ती आधारभुत विद्यालय र लक्ष्मी मावि अमरापुरीलाई क्वारेन्टिनको रुपमा सञ्चालन गरिएको पौडेलले बताए । निर्माण गरिएका सवैजसो क्वारेन्टिनमा २० जनासम्म रहनसक्ने क्षमता छ । एसपीएम कलेज बाहेक सवै क्वारेन्टाईनमा गरि भारतबाट फर्केका ४१ जना सुरक्षीत रुपमा बस्न सुरु गरेको नगरप्रमुख पौडेलले बताए । एसपीएम कलेजको क्वारेन्टिन पनि सञ्चालनको लागी तयारी अवस्थामा रहेको उनले जानकारी दिए ।

• होटलहरु क्वारेन्टिन बनाउन तयारी

भारत सहित तेस्रो मुलुकबाट समेत नगरवासीहरु आउने भएपनि नगरपालिकाले क्वारेन्टिन लाई थप ब्यवस्थित बनाउने तयारी गरेको छ । विभिन्न विद्यालयहरुमा सञ्चालन गरिने क्वारेन्टिनको क्षमताले धान्न नसक्ने भएपछि नगरपालिकाले गुणस्तर समेत कायम हुने गरि स्थानीय होटल ब्यवसायीहरुसँग क्वारेन्टिन निर्माणका लागी छलफल थालेको नगरपालिकाका प्रमुख प्रशासकीय अधिकृत रामप्रसाद आचार्यले जानकारी दिए ।

विदेशमा रहेका नगरवासीहरु फर्कने क्रम बढ्दै जाने देखिएकोले सहुलियत दररेटमा उहाँहरुको ब्यवस्थापन कसरी गर्न सकिन्छ भनेर नगरपालिकाले व्यवसायीहरुसँग छलफल सुरु गरेको आचार्यले जानकारी दिए । उनका अनुसार केहिदिनमै छलफलले पूर्णता पाउने छ त्यसलगत्तै नगरभित्र रहेका केहि होटलहरुसमेत क्वारेन्टिनका रुपमा सञ्चालन हुनेछन । प्रमुख प्रशासकीय अधिकृत आचार्यले क्वारेन्टिनमा बस्ने सबैको अनिवार्य रुपमा पीसीआर परिक्षण गरेर मात्रै घर पठाईने बताउदै घरमा समेत केहिदिन सुरक्षीत रुपमा बस्न आग्रह गरिने बताए ।

• उद्धारका लागी गाडी तयारी अवस्थामा

यसैविच नगरपालिकाले भारतबाट सीमानाकासम्म आउने नगरवासीहरुलाईं मध्यनजर राख्दै सवारीसाधन तयारी अवस्थामा राखेको छ ।देशका विभिन्न सीमानाकामा आएकाहरुलाई उद्धार गरि नगरपालिका सम्म ल्याउनका लागी सवारी साधन तयारी अवस्थामा राखेको क्वारेन्टाईन व्वस्थापन समितिका संयोजक गोविन्द सुवेदीले जानकारी दिए । यसका लागी छिमेकी नगरपालिकासँग समेत समन्वय गरिएको उनले बताए ।