लमजुङ/पूर्वि लमजुङको राइनास नगरपालिकाका तिन वडालाई मौरी पकेट क्षेत्रको रुपमा विकास गरिदै छ । राइनास नगरपालिका वडा नं. १, २ र १० वडालाई मौरी पकेट क्षेत्रको रुपमा विकास गरिने भएको हो । मौरिपालनको सम्भाव्यतालाई मध्यनजर गर्दै वडा नं १ को वोराङखोला, २ को पन्थेडाँडा र भलायखर्क, वडा नं. १० को लामागाउँ र काकेगाउँलाई मौरी पकेट क्षेत्रको रुपमा प्रवद्र्धन गर्न लागिएको राइनास नगरपालिकाले जनाएको छ ।

कृषि तथा पशुपालनलाई प्रथामिकतामा राखेर सोको प्रवद्र्धनका लागि विभिन्न कार्यक्रमहरु सञ्चालन हुदै आएको राइनासमा व्यवसायिक मौरी पालन र मह उत्पादनलाई प्रवद्र्धन गर्न प्रधानमन्त्री कृषि आधुनिकरण परियोजना अन्र्तगत पकेट क्षेत्र विकास कार्यक्रम सञ्चालन गरिएको हो । व्यवसायिक मौरी पालनका लागि प्रवल सम्भाव्यता भएको र स्थानिय कृषकहरुको पनि चाहाना भएकोले सो क्षेत्रलाई विशेष प्राथमिकतामा राखेर पकेट क्षेत्र विकास कार्यक्रम अघि बढाइएको नगरप्रमुख खड्गवहादुर गुरुङले बताउनुभयो ।

कार्यक्रमका लागि चालु वर्ष प्रधानमन्त्री कृषि आधुकिनकरण परियोजनाबाट १२ लाख वजेट विनियोजन भएको छ । तिन वटै वडामा सञ्चालित मौरी पकेट क्षेत्र विकास कार्यक्रम परियोजनाको ५० प्रतिशत र किसानको ५० प्रतिशत गरी कुल २४ लाख बजेटको रहनेछ ।  कार्यक्रम कार्यन्वयका लागि तिनवटै वडामा गरी तिन वटा उपभोक्ता समिति वनाइएको छ । पकेट क्षेत्र विकास कार्यक्रमका लागि कम्तिमा पनि तिन सय घारमा मौरी मालन व्यवसाय सञ्चालन गर्नुपर्ने प्रावधान अनुसार सो क्षेत्रमा व्यवसायिक मौरिपालन गर्दै आएका तथा मौरी पालन गर्न चाहने किसानहरुको संलग्नतामा समित गठन गरिएको हो ।

पहिलो चरणमा सवै किसानहरुलाई स्थलगत रुपमा प्रयोगात्मक प्रशिक्षण दिइएको राइनास नगरपालिका कृषि शाखा प्रमुख पवन ढकालले वताउनुभयो । किसानहरुलाई मौरीको परिचय, मौरीको प्रकार, मौरीपालनको महत्व, खानेकुरा तथा चरन क्षेत्रको व्यवस्थापन, घार विभाजन तथा व्यवस्थापन, रोग किरा व्यवस्थापन लगायतका विषयमा सैद्धान्तिक प्रशिक्षण दिइएको थियो । सात दिन सम्म स्थलगत रुपमा दिईएको तालिम अन्र्तगत वडा नं. १ मा ५३ जना, २ मा ४१ जना र वडा नं. १० मा ४० जनाको सहभागिता थियो ।

तालिम पश्चात किसान हरुलाई उनिहरुको माग अनुसार ५० प्रतिशत अनुदानमा मौरि सहितको घार, खाली घार र मौरिपालन व्यवसाय सञ्चालन गर्दा आवश्यक पञ्जा, टोपी लगायतका सामाग्रि समेत वितरण गरिने कृषि शाखा प्रमुख ढकालले जानकारी दिनुभयो ।  कार्यक्रम अन्र्तगत यसवर्ष १ सय ८५ मौरी सहितको घार र १ सय १५ खाली घार वितरण गरिने कृषि शाखाले जनाएको छ । पकेट क्षेत्र विकास कार्यक्रमले निर्वाहमुखी कृषिलाई व्यावसायिक बनाउन सहयोग पुग्ने अपेक्षा लिइएको छ ।