चितवन/नासा नेपाल वाग्मती संघ तथा चितवन अटोमोवाइल्स डिलर्स एसोसीएसन (काडा )को संयुक्त आयोजनामा भएको अटो जिमखाना प्रतियोगिता सम्पन्न भएको छ । शुक्रबार र शनिबार भएको प्रतियोगितामा आशिष भारती प्रथम हुनु भएको छ । त्यस्तै फेलिक्स सिंह भान दोस्रो र दिग्वीजय सिंह अधिकारी तेस्रो हुन सफल हुनु भएको छ । प्रतियोगितामा २१ खेलाडी सहभागी हुनु भएको थियो ।

प्रतियोगितामा प्रथम, दोस्रो र तेस्रो हुनेहरुले क्रमश २७ हजार, ९ हजार र ३ हजार नगद सहित प्रमाण पत्र र शिल्ड प्रदान गरिएको थियो । भरतपुर नगरपालिकाका प्रमुख रेणु दाहालले विजेतालाई पुरस्कार,मेडलसहित प्रमाणपत्र प्रदान गर्नुभएको थियो । प्रतियोगितामा प्रथम हुने भारतीले भरतपुर महानगरपालिका वडा नं. २९ चौकी डांँडा स्थित हिमालय फ्रन्टियर्सले सञ्चालनमा ल्याएको पाराग्लाइडिङ्ग निःशुल्क समेत गर्न पाउनुहुनेछ । सो अवसरमा बोल्दै भरतपुर महानगरपालिकाका प्रमुख रेनु दाहालले चितवनलाई साहसिक र खेल पर्यटनको मूख्य गन्तव्य बनाउने अभियानमा यस्ता खेलले सहयोग पुग्ने बताउनु भयो । पछिल्लो समय महानगरले खेलका गतिविधिलाई समेत प्राथमिकता दिदै आएकोले यसले पर्यटन प्रर्वद्धनमा नयांँ आयाम थपिने उहांँको भनाई छ । यस प्रतियोगितामा काडा चितवनमा आबद्ध र खेलप्रेमी व्यवसायीहरुको सहभागिता रहेको थियो । च्याम्पीयनसिपका विजेता १ जना पुरुष तथा महिला बाट १ जनाले (वेष्ट टाइमिङ्गको आधारमा) आगामी नोभेम्बरमा ताइपेइमा हुने एसिया प्यासिफिक अटो जिमखाना च्याम्पीयनसिपमा सहभागिको अवसर प्राप्त गर्नेछन । प्रतियोगिताको प्राविधिक कार्यको लागि नासा नेपालका दक्ष मार्शलहरुको उपस्थिति रहेको थियो । यो चितवनकै पहिलो रोमाञ्चक र साहसिक अटो जिमखाना प्रतियोगिता हो ।