भरतपुर/राप्ती नगरपालिका २ स्थित पिप्ले खानेपानी तथा सरसफाई उपभोक्ता समितिको अध्यक्षमा राजकुमार भट्ट निर्वाचित भएका छन् । नयाँ नेतृत्वका लागि शनिवार भएको मतदानको मध्यरातमा आएको अन्तिम मतपरिणाममा भट्ट प्रतिद्धन्द्धी भन्दा ७७३ मतान्तरले निर्वाचित भएका हुन् । समितिको अध्यक्षमा भट्टको यो तेश्रो कार्यकाल हो ।

दोश्रो कार्यकालका लागि अष्ट्रेलियामै बसेर निर्वाचन जितेका भट्टले ह्याट्रिक गर्ने कुल खसेको मत मध्ये करिव ८२ प्रतिशत मत प्राप्त गरे । भट्टलाई चुनौती दिन नेपाली काग्रेश,नेकपा माओवादी केन्द्र,एकिकृत समाजवादी र राप्रपाले गठबन्धन गरेका थिए । गठबन्धनलाई सहज रुपमा पराजीत गरेका भट्ट नेकपा एमालेबाट उम्मेदवार थिए । गठबन्धनबाट अध्यक्षमा कृष्णप्रसाद पाण्डे उम्मेदवार थिए । उनी नेपाली कांग्रस राप्ती नगर समितिका उपसभापति पनि हुन् ।

तेश्रो पटक अध्यक्ष बन्ने क्रममा भट्टले कुल खसेको मत मध्ये ९२३ मत प्राप्त गर्दा उनका प्रतिद्धन्द्धी पाण्डेले १५० मत मात्रै प्राप्त गर्न सके । निर्वाचनमा एक हजार १२३ मत खसेको थियो । पदाधिकारीमा भट्ट नेतृत्वको प्यानलनै निर्वाचित भएको छ । अध्यक्ष बाहेक अन्य पदमा राष्ट्रिय स्वतन्त्र पार्टीले पनि प्यानलनै उभ्याएको थियो ।

समितिको उपाध्यक्षमा उद्धव प्रसाद सिलवाल ३७० मतका साथ विजयी भए । उनका प्रतिद्धन्द्धीहरु ज्ञान प्रसाद पाण्डेले २८९ मत र रघुनाथ उप्रेतीले २३५ मत प्राप्त गरे । सचिवमा रामेश्वर गौतम निर्विरोध भएका थिए ।

कोषाध्यक्षमा राम प्रसाद वर्तौला निर्वाचित भए । वर्तौलाले ४३० मत प्राप्त गर्दा उनका प्रतिस्पर्धीहरु मन्जु खरेलले २७७ मत र रामबहादुर राईले २०८ मत पाए ।  सहसचिवमा विजयी भएका गोकर्णबहादुर विसुन्केले ३२९ मत प्राप्त गरे । उनका प्रतिद्धन्द्धीहरु सन्दिप धरेलले ३१८ मत तथा दिपककान्त पाठकले १५५ मत पाए ।

सदस्यहरुमा पाँच जना एमाले निकटका विजयी हुँदा एक जना राप्रपा निकटका विष्णुदेवी ठकुराँ ३८२ मत ल्याएर निर्वाचित भए । अन्य सदस्यहरुमा शिष्टता थपलिया ४१८ मत,चन्द्र वहादुर राई ३२७ मत,लिलानाथ घिमिरे ३२६ मत,वुद्धिराज उप्रेती ४९० मत र विष्णु प्रसाद ढकाल ३५८ मतका साथ निर्वाचित भएका छन् ।