कावासोती/नवलपुरको सेहरीस्थित पोस्टनजिक कै एउटा भाले गैडा मृत अवस्थामा भेटिएको छ । निकुञ्जका सूचना अधिकारी रहेका सहायक संरक्षण अधिकृत गणेशप्रसाद तिवारीका अनुसार निकुञ्जभित्र बुधबार बिहान साढे ९ बजेतिर गस्तीमा रहेको टोलीले अन्दाजी २० वर्षको गैंडा मृत अवस्थामा फेला परेको हो ।

निकुञ्जको पश्चिम क्षेत्रमा पर्ने अमलटारी सेक्टरको सेहरी पोस्टनजिक गैंडा मृत भेटिएको तिवारीले बताए । गैंडाको खाग र खुर सुरक्षित रहेको निकुञ्जले जनाएको छ । घटनास्थलको अवस्था हेर्दा आपसमा जुधेका कारण गैंडा मरेको देखिन सक्ने तिवारीले जनाएका छन् । यो सहित चालू आर्थिक वर्षमा चितवन निकुञ्ज र मध्यवर्ती क्षेत्रमा १३ गैंडाको मृत्यु भएको छ ।