चितवन/ चितवन प्रहरीले एक करोड बढी मूल्यको सुन र हिराका गहना सहित तीनजना भारतीयलाई पक्राउ गरेको छ । प्रहरीले ६३ तोला भन्दा बढी सुन र हिराजडित गरगहना २२ तोला भन्दा बढी बरामद गरेको हो । उक्त गहनाको अनुमानित मुल्य १ करोड १० लाख बराबर रहेको छ । बहुमुल्य गरगहनाको अबैध ओसार पसार भईरहेको भन्ने बिशेष सूचनाको आधारमा जिल्ला प्रहरी कार्यालय चितवनबाट खटिएको प्रहरी टोलीले फागुन १६ गते राति १ बजेको समयमा भरतपुर महानगरपालिका वडा नं १२ गोन्द्राङ स्थित पुर्व पश्चिनम लोकमार्ग सडक खण्डबाट तीनजना भारतीयलाई पक्राउ गरेको हो ।

पक्राउ पर्नेमा कार चालक भारत, उत्तर प्रदेश राज्य, बलिया जिल्ला फेफना थाना बस्ने बर्ष ४२ को विनोद प्रसाद, कारमा सवार भारत, पश्चिम बंगाल राज्य, हौडा जिल्ला गोलावाडी पुलिस थाना, सल्किया स्कुलरोड कलकत्ता बस्ने बर्ष ५१ को गणपत कुमार तोसावर र कारमा सवार सोही ठाउं बस्ने बर्ष ४२ को नरेश बर्मा पक्राउ परेका हुन् । पूर्वतर्फबाट पश्चिमतर्फ आउँदै गरेको भारतिय नं को टाटा कम्पनीको डब्लुबी १२ एभी ५५६६ नम्बरको कारलाई रोकी चेकजाँच गर्दा उक्त कारको ड्राईभर बस्ने सिटको पछाडिको सिटमुनी गियर बक्स भित्र र एअर फिल्टर भित्र लुकाई छिपाई ल्याएका बहुमुल्य हिरा र सुनका गर गहना, बिभिन्न किसिमका पत्थर समेत फेला परेको चितवन प्रहरी प्रमुख प्रहरी उपरक्षिक रामेश्वर कार्कीले बताए । उनीहरुबाट सुन जस्तो देखिने पहेलो धातुको चोकर थान १२,सुन जस्तो देखिने पहेलो धातुको सिक्री पाईप थान ५ ,सुन जस्तो देखिने पहेलो धातुमा हिरा जस्तो देखिने चम्किलो धातु जडित औठी थान २, सुन जस्तो पहेलो धातुको बक्स औठी थान ८, सुन जस्तो देखिने पहेलो धातुको मिनि हार थान ५,सुन जस्तो देखिने पहेलो धातुको टोपा औठी थान २ , सुन जस्तो देखिने पहेलो धातुको लकेट थान ४ , सुन जस्तो देखिने पहेलो धातुको झुम्का ३१ जोर, सुन जस्तो देखिने पहेलो धातुको चप्रा नभरेको चुरा थान ६, ,सुन जस्तो देखिने पहेलो धातुमा चप्रा र लाहा भरेको चुरा थान ४, सुन जस्तो देखिने धातुको कल्ली बाला मिना सहित थान ४ , हिरा जस्तो देखिने चम्किलो धातुको हार थान ७ , हिरा जस्तो देखिने चम्किलो धातुको ब्रास्लेट थान १ , हिरा जस्तो देखिने चम्किलो धातुको वाला थान १ , हिरा जस्तो देखिने चम्किलो धातुको औठी थान ४, हिरा जस्तो देखिने चम्किलो धातुको लकेट थान २, हिरा जस्तो देखिने चम्किलो धातुको झुम्का थान १० , हिरा जस्तो देखिने चम्किलो धातुको टप थान १२ , बिभिन्न किसिमका पत्थर ३६ थान बरामद भएको हो ।
बरामद सुन र कारलाई राजस्व अनुसन्धान कार्यालय हरिहर भवन काठमाडौंमा पठाइने प्रहरी उपरीक्षक कार्कीले जनाए । चितवनमा प्रहरीको यो ठूलो सफलता मानिएको छ ।